ʻAihue ʻia kekahi mau keiki.
Ua ʻaihue hewa ʻia aku nei kekahi mau keiki i ka pō Pōʻaono nei ma Mililani. He ʻehā makahiki o kekahi, a he 14 makahiki o kekahi. Aia lāua ma luna o kekahi kaʻa, a i ia manawa, kau aʻela kekahi kāne a me kekahi wahine ma luna o ia kaʻa me ka manaʻo e ʻaihue, a kalaiwa akula. He 35 minuke ma hope mai, waiho wale ʻia iho nei ke kaʻa me nā keiki ma luna ma kekahi wahi. ʻAʻole i pōʻino iki nā keiki. ʻAʻole paha i manaʻo ia mau kolohe e ʻaihue keiki. Aia nō ka mākaʻi ke noiʻi aʻela.
ʻAʻole e hoʻolilo ʻia ka pakalōlō i mea pono ma ke kānāwai ma Hawaiʻi nei i kēia kau. Aia nō ma ke Kōmike Ola Kino o ka ʻAha Kenekoa a me ke Kōmike Moʻohelu Kālā ka pila e hoʻolilo ana i ka puhi pakalōlō ʻana o ke kanaka makua i mea pono ma ke kānāwai. Akā, ua hala ka Puʻulena, ka lā kau palena hoʻi e hoʻoholo ai ia mau kōmike no ka holo mua ʻana o ia pila. Na ke Poʻo o ka ʻAha Kenekoa, J. Kalani English i hāpai i ia pila a ua kākoʻo ʻia e ka hapalua like o nā Kemokalaka o ka ʻAha Kenekoa. A ʻo ia ka mea i manaʻo ʻia ai, e lilo ia i mea pono ma ke kānāwai i kēia kau. ʻO kekahi pilikia, he mea hoʻokuʻikuʻi ia i ke kānāwai pekelala, ʻo ia hoʻi, ma ke kānāwai pekelala, he lāʻau kūʻē kānāwai ka pakalōlō, a ke hoʻolilo ʻia i mea pono ma ke kānawai, e pilikia auaneʻi ka polokalamu pakalōlō lapaʻau e kū nei.
Eia mai kā kākou ʻōlelo noʻeau,
Aia i Kona i Honalo.
ʻO ia hoʻi, ua nalowale kekahi mea.
Ke Aolama 