03-06-19

Alu like kekahi mau loio kuhina he 21 ma ke kūʻē ʻana i kahi kānāwai pekelala hou.

ʻO ia aʻela kekahi poʻo nūhou o kēia lā, ka lā 6 o Malaki, he Pōʻakolu. Welina e nā makamaka. ʻO Ke Aolama kēia a penei ka nūhou.

ʻO ka nui o ka pakalōlō lapaʻau i kūʻai ʻia i kēlā makahiki aku nei, i ka makahiki 2018 hoʻi, he 1,569 paona. A ʻo ka waiwai, he $12.6 miliona. I ka mahina ʻo Ianuali o ka makahiki 2018, he $681,389, a i ka mahina ʻo Kēkēmapa, ua piʻi loa aʻela a ka $1.5 miliona. I ka Pōʻalua nei, ʻakahi nō a hoʻomaka ke kākau inoa ʻana ma ka pūnaewele. He hiki i nā kānaka noho paʻa ma Hawaiʻi a me nā malihini e kipa mai ana ke kākau inoa pēlā. Ma muli o ia ʻano kākau inoa ʻana, ua kohokoho ʻia, e māhuahua ana nā kānaka kūʻai pakalōlō lapaʻau, he 20 pākeneka a emi mai paha ma Hawaiʻi nei.

He kānāwai pekelala hou ke kū ana i manaʻo ʻia, he kūʻē kumu kānāwai ia. Ma ua kānāwai lā, e hoʻohāiki ʻia ka ʻike a me nā ala e hiki ai i nā mea like ʻole e pono ai ke ola o ka wahine ma ka hoʻohānau. Inā lilo ke kālā Title X i kekahi hui, e pāpā ʻia aku ia hui, ʻaʻole e hoʻouna aku i ka wahine i kahi e ʻōmilo ai, ʻoiai naʻe he noi kā ka wahine. Ua waiho aku nei ka Loio Kuhina o ʻOlekona, ʻo Ellen Rosenblum, a me ka Loio Kuhina o Nū Ioka, ʻo Letitia James i hoʻopiʻi ma ka ʻAha ʻĀpana ʻAmelika Hui Pū ʻIa ma Eugene, ʻOlekona. A komo pū akula i ia hoʻopiʻi nā loio kuhina he 19 hou. A ʻo ka Loio Kuhina o Hawaiʻi, ʻo Clare E. Connors, kekahi i komo pū. A eia mai nā ʻāina ʻē aʻe o nā loio kuhina i komo pū, ʻo Kololako, ʻo Konekikuka, ʻo Kelawea, ʻo ka ʻĀpana ʻo Kolumepia, ʻo ʻIlinoe, ʻo Melelana, ʻo Makakukeka, ʻo Mikikana, ʻo Minekoka, ʻo Nevada, ʻo Nū ʻIeleke, ʻo Nū Mekiko, ʻo Kalolaina ʻĀkau, ʻo Penekelewinia, ʻo Loke ʻAilana, ʻo Welemoneka, ʻo Wilikinia, a me Wikonekia.

Eia mai kā kākou ʻōlelo noʻeau,

Neʻe papa ka helu a ka lā i Punahoa.

ʻO ia hoʻi, ʻaʻole i pau koke ka hakakā ʻana.

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s