03-08-19

Aia ka naonao ahi liʻiliʻi ma Oʻahu nei.

ʻO ia aʻela kekahi poʻo nūhou o kēia lā, ka lā 8 o Malaki, he Pōʻalima. Welina e nā makamaka. ʻO Ke Aolama kēia a penei ka nūhou.

Ua punia kekahi mau wahi o ʻĀhuimanu i ka naonao kiki, ʻo ia hoʻi, ʻo ka naonao ahi liʻiliʻi. ʻO ka lua ia o ke kaiāulu o nā Koʻolau ma Oʻahu nei, kahi i loaʻa ai ka naonao kiki. ʻO kahi mua, aia i Kāneʻohe. ʻAkahi nō a kīkī ʻia ka laʻau make ma ia mau wahi. He ʻekolu ʻeka ʻāina ka nui. A ua loaʻa nō hoʻi ia naonao ma kekahi lāʻau i kūʻai ʻia ma ka Pea o ka Punahou. ʻŌlelo aʻela ʻo Phyllis Shimabukuro-Geiser, ka luna hoʻomalu kūikawā o ka Papa Mahiʻai o Hawaiʻi, he mea kēia e makaʻala ai nā kānaka mea hale ma nā mokupuni i laha ʻole ai ka naonao ahi liʻiliʻi i ʻike koke ʻia ke hiki aku i laila. A ʻo nā kānaka i huakaʻi aku i kahi i nui lehulehu ai ia naonao, e makaʻala i ʻole e halihali ʻia ia naonao a laha ma nā wahi like ʻole.

Ua hala ka Puʻulena no ka hoʻolilo ʻana a ka ʻAhaʻōlelo o Hawaiʻi nei i ka pakalōlō i mea pono ma ke kānāwai. Akā, i ka Pōʻahā nei, ua ʻāpono aku nei ka Hale o nā Lunamakaʻāinana i ka Pila Hale 1383. Ma ia pila, e loaʻa ke kanaka makua i ka hoʻopaʻi inā he ʻekolu kalama pakalōlō a emi mai ma kona malu me ka loaʻa ʻole o ka palapala pakalōlō lapaʻau. He $200 ka hoʻopaʻi, akā, ʻaʻole e hoʻopiʻi ʻia ke kanaka no ke kalaima. Ma ke kānāwai o Hawaiʻi i kēia manawa, ʻo ka hoʻopaʻi kiʻekiʻe loa, he 30 lā ma ka hale paʻahao a me ka uku ʻana paha he $1,000.

Eia mai kā kākou ʻōlelo noʻeau,

Hoʻohewahewa ke aloha, aia i Puna i Nānāwale.

ʻŌlelo ʻia kēia ke ʻike mai kahi hoa aloha iā ʻoe akā, ʻaʻole ʻo ia aloha mai a ʻōlelo mai paha iā ʻoe.

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s