He pila hou no ka pono ka poʻe eʻe moku o Hawaiʻi nei.
ʻO ia aʻela kekahi poʻo nūhou o kēia lā, ka lā 11 o Malaki, he Pōʻakahi. Welina e nā makamaka. ʻO Ke Aolama kēia a penei ka nūhou.
Pau aku nei he 500 ʻeka ʻāina o Nānākuli me Waiʻanae i ke ahi. Ua ʻā ʻia ke ahi i ka wanaʻao o ka Lāpule nei. Aia ma uka aʻe nei o ka hale kūʻai ʻo Sack-N-Save ma Nānākuli. E lapalapala ana ke ahi ma kahi o ke alanui ʻo Mokiawe, ke alanui ʻo Helelua a me ke alanui ʻo Nanikeola. A ʻaneʻane e hiki mai i kekahi mau hale. A hōlapu akula ke ahi a i ke Awāwa ʻo Waiʻanae. I ka hola 4:30 o ka ʻauinalā o nehinei, ua pau he 80 pākeneka o ke ahi i ka hoʻomalu ʻia.
Holo mua akula ka Pila Kenekoa 557 ma ka ʻAha Kenekoa i kēlā pule aku nei a hoʻouna ʻia i kekahi mau kōmike o ka Hale o nā Lunamakaʻāinana. ʻO ka Pila Kenekoa 557, he pila ia e hoʻomalu ana i ka poʻe eʻe moku i loaʻa ʻole ka palapala noho ʻAmelika, he uku naʻe i ka ʻauhau. Inā lilo ia pila i kānāwai, ʻo ka poʻe mākaʻi o ka mokuʻāina o Hawaiʻi, he koho kā lākou i ke kōkua a me ke kōkua ʻole paha ma ka ʻimi ʻana o ka mākaʻi pekelala i ka poʻe eʻe moku i loaʻa ʻole ka palapala noho ʻAmelika. Ma ua pila lā, aia wale nō a hoʻāhewa ʻole ʻia ke eʻe moku i ka pili i ka hewa, a he uku ʻo ia i ka ʻauhau, a laila, e hoʻomalu ʻia ʻo ia ma kēia kānāwai.
Eia mai kā kākou ʻōlelo noʻeau,
Pue i ke anu o Hauaʻiliki.
ʻO ia hoʻi, he keu aku a ke anuanu.
Ke Aolama 