Kī wale ʻia akula nā kānaka o kekahi mau hale pule ma Aotearoa.
ʻO ia aʻela kekahi poʻo nūhou o kēia lā, ka lā 15 o Malaki, he Pōʻalima. Welina e nā makamaka. ʻO Ke Aolama kēia a penei ka nūhou.
He 49 mau kānaka a ʻoi aku paha i make i ke kī pū ʻia ma kekahi mau mokeko ʻelua ma Christchurch, Aotearoa i ka Pōʻalima. Ua hopu ʻia ihola kekahi kanaka a hoʻopiʻi ʻia ʻo ia no ka pepehi kanaka. A hopu ʻia nō hoʻi kekahi mau kānaka ʻelua i hoʻohuoi ʻia, a he pū ma ko lāua malu. ʻAʻole naʻe i maopopo kā lāua hana i kēia manawa. ʻO Brenton Tarrant paha ka inoa o ka mea nāna ke kī pū ʻana. Ua komo akula ʻo ia i loko o ka Mokeko ʻo Al Noor i ka wā pule, a kī wale akula i nā pū he mau manawa, a i kekahi manawa, kī hou akula i ka poʻe i kū ʻē i ka pōkā. A i kona wā e kī ana i nā kānaka i ka pū, e paʻi wikiō ana ʻo ia i kāna hana me ka hoʻolele ʻana aku ma ka pūnaewele i ka wā like. ʻO ka lua o ka mokeko i kī pū ʻia ai nā kānaka, ʻo ia ka Mokeko ʻo Linwood. ʻAʻole naʻe i maopopo ke kanaka nāna ia hana.
Ua eo ihola nā Kāne Ānuenue iā Kekaha Loa ma ka helu ʻai he 68 a Kekaha i ke 66. A ʻo ka hopena ihola ia o ke kau pōpō hīnaʻi o Hawaiʻi. ʻO ka puni mua ia o ka Hoʻokūkū o ka ʻAhahui Komohana Nui. ʻO ka mea ʻāpiki, e ʻoi ana ʻo Hawaiʻi he 18 ʻai ma luna o Kekaha Loa ma ka hapalua mua. A i ka wā he 7:03 i koe a kani ka pū hope loa, e ʻoi ana nā Ānuenue ma ka helu ʻai he 59 i ke 47. Hiu aʻela naʻe nā Kanahākūmāiwa a kāʻili i ka lanakila.
Eia mai kā kākou ʻōlelo noʻeau,
Aloha mai nō, aloha aku; ʻo ka huhū ka mea e ola ʻole ai.
He mea nui ke aloha. ʻAʻole ka huhū he mea e ola ai.
Ke Aolama 