Ua lilo paha i mea maʻa mau ka hoʻokuʻu ʻia ʻana o ka paʻahao ma hope o kona lā hoʻokuʻu.
ʻO ia aʻela kekahi poʻo nūhou o kēia lā, ka lā 18 o Malaki, he Pōʻakahi. Welina e nā makamaka. ʻO Ke Aolama kēia a penei ka nūhou.
He pilikia ko nā hale paʻahao o Hawaiʻi nei. ʻAʻole i hoʻokuʻu ʻia kekahi mau paʻahao i ka lā kūpono, ʻo ia hoʻi, ua noho paʻahao lākou a lōʻihi loa, ua ʻoi aku i ko lākou hoʻopaʻi i kau ma luna o lākou. ʻO Jacob Johnson a me Nolan Fraser kekahi. A ua holo ka manaʻo o ke aupuni mokuʻāina e uku i kahi puʻu kālā iā lāua. Aia a ʻāpono ʻia e ka ʻAhaʻōlelo, a laila, e uku ʻia lāua. ʻO Johnson, e kaʻa ana iā ia he $18,000. A ʻo Fraser, e kaʻa ana iā ia he $25,000. He ʻehā mau paʻahao hou aku e hoʻopiʻi nei i ke aupuni mokuʻāina no ko lākou hoʻokuʻu ʻole ʻia ʻana i ka wā kūpono. Ua noho lākou he mau mahina hou. I ka makahiki 2018, ua hoʻokuʻu ʻia he ʻeiwa mau paʻahao ma hope o ka ʻike ʻana o ke Keʻena Hoʻomalu Lehulehu o ke aupuni mokuʻāina, ua hala ko lākou lā hoʻokuʻu. ʻO ka mea ʻāpiki, ʻaʻole i hoʻomaopopo ʻia nā paʻahao, ua noho paʻahao hewa lākou a lōʻihi loa. A no laila, ʻaʻole paha i maopopo i ia mau paʻahao. Mai mua mai nō kēia pilikia. I ka makahiki 2004, ua paʻa ihola kahi ʻaelike ma waena o ke aupuni mokuʻāina a me kekahi mau paʻahao i mea e pau ai ka hoʻopiʻi ʻana o ia mau paʻahao i ke aupuni. ʻO kā lākou mea i hoʻopiʻi ai, ʻo ia ka noho paʻahao ʻana a hala ko lākou lā hoʻokuʻu. He mau haneli paʻahao, a he $1,000 o ka lā i lilo iā lākou no kēlā me kēia lā ma hope o ka lā hoʻokuʻu. A inā ua ʻimi ʻia ko lākou kino kohana, he $3,000 i lilo iā lākou.
I ka Lāpule nei ka hiki ʻana mai o ka mokulele mua o ka Hui Mokulele ʻo Southwest. A he 165 mau ʻōhua. I mea e piha ai nā mokulele o Southwest e lele mai ana i Hawaiʻi nei, ua hoʻēmi ʻia ke kumu kūʻai a he $49 no ka lele ʻana mai ʻAmelika a i Hawaiʻi. A no ka lele pili ʻāina, he $29. E hoʻomaka ka lele pili ʻāina ʻana i ka lā 28 o ka mahina ʻo ʻApelila. I ia manawa, e lele ana ma waena o Honolulu a me Kahului. A i ka lā 12 o Mei e hoʻomaka ai ka lele ʻana ma waena o Honolulu a me Kona.
Eia mai kā kākou ʻōlelo noʻeau,
Pae maila ka waʻa i ka ʻāina.
ʻO ia hoʻi, ua māʻona ka ʻōpū. A i ʻole ia, ua hiki mai kekahi.
Ke Aolama 