Ua hala ka Honolulu Skylark i ke ao polohiwa a Kāne.
ʻO ia aʻela kekahi poʻo nūhou o kēia lā, ka lā 22 o Malaki, he Pōʻalima. Welina e nā makamaka. ʻO Ke Aolama kēia a penei ka nūhou.
Ua moe ihola ʻo Jacqueline Leilani “Honolulu Skylark” Rossetti i ka moe kapu o Niolopua. He wahine i hele a kaulana ma ka lekiō. He nui kāna mau hana e laha ai ke mele Hawaiʻi ma ka lekiō a ma Hawaiʻi a puni. ʻO Rossetti, ʻo Krash Kealoha a me Kimo Kahoano nā mea i hoʻokumu iā Nā Makana Hōkū Hanohano. A ua lilo iā ia ka Makana “Aloha Is” o Moe Keale i ka makahiki 2014. I ka Pōʻakolu nei kona hala ʻana i kēlā ʻaoʻao. Ua piha nā makahiki he 65 iā ia. A ʻo ka maʻi hakuʻala kona mea i make ai. Ua haʻalele mai ʻo ia i hope nei i kona kōkoʻolua, iā Kimo Laau, i kāna mau keiki, iā Imaka Lindsey, Kilohana Lindsey, Makana Rossetti-Ota a me kāna mau moʻopuna he ʻeono. Aia nō ke hoʻolālā ʻia akula ke anaina hoʻolewa.
He manaʻo ko kekahi poʻe, e hana ʻia he kahua heihei kaʻa ma Kalaeloa, ma ke kahua ʻoihana moku ma mua ʻo Barber. E mālama ʻia ana he hālāwai hoʻolohe e ke Kōmike ʻOihana Malihini Mākaʻikaʻi, Hoʻomōhala Kūlana Waiwai me Hana Uila o ka ʻAha Kenekoa o Hawaiʻi i kēia lā ma ka hola 2:45 o ka ʻauinalā. A e mālama ʻia kekahi e ka Hale o nā Lunamakaʻāinana i kēia pule aʻe. ʻO ka makemake, e kūkulu ʻia ke kahua heihei ma nā ʻeka ʻāina he 220 ma ia kahua ʻoihana moku. A ke lilo i kahua heihei, ʻo ke ʻano heihei ke mālama mua ʻia, ʻo ia ke ʻano heihei kone alanui, a ma hope aku paha, e mālama ʻia ka heihei hapahā mile, ka heihei pōʻai lōʻihi, a me ka heihei mokokaikala holo lepo. He nui paha ka pilikia i ke kanikani, ke ehu lepo, a ma kahi kokoke ia i nā hale noho, ke kahua pāʻani kolepa ʻoihana moku, a me ke Kahua ʻo ʻEwa, he wahi i kaulana i ka hoʻouka kaua ʻia e Iāpana ma ka lā 7 o Kēkēmapa o ka makahiki 1941. A ʻo kekahi, ma laila, he mau wahi i kanu ʻia ai ka iwi o nā kūpuna, nā wahi pana, a pēlā aku.
Eia mai kā kākou ʻōlelo noʻeau,
Pēpē i ka ua hoʻopoponi ʻili.
He ʻōlelo kēia no ke kanaka i ʻehaʻeha kona naʻau.
Ke Aolama 