03-27-19

Ola loko i ke aloha.

ʻO ia aʻela ke poʻo nūhou o kēia lā, ka lā 27 o Malaki, he Pōʻakolu. Welina e nā makamaka. ʻO Ke Aolama kēia a penei ka nūhou.

Mālama aku nei kekahi mau hālau hula a me kekahi mau mea hoʻokani pila o Hawaiʻi nei i ʻaha mele ma Aotearoa. A ʻo nā pōmaikaʻi, ua lilo akula no nā kānaka i make ma Christchurch a me ko lākou mau ʻohana. I hele ia mau hālau hula a me nā mea hoʻokani pila i ʻAukalana, Aotearoa no ka Hoʻolauleʻa ʻo Pasifika. Akā, ua kāpae ʻia aku ia hoʻolauleʻa ma muli o ke kī ʻia ʻana o nā kānaka ma kekahi mau mokeko ʻelua ma Christchurch. I kāpae ʻia ma muli o ka lawa ʻole o nā mākaʻi e pono ai ka hoʻolauleʻa. ʻO nā kānaka o Hawaiʻi i hele aku i laila no ka Hoʻolauleʻa ʻo Pasifika, ʻo ia ke Kumu Hula Maelia Loebenstein Carter a me ka hālau ʻo Ka Pā Hula o Kauanoe o Waʻahila, ka Miki Aloha Hula ma mua ʻo Kauʻi Dalire, ʻo Mailani Maikainai, ʻo Bryan Tolentino, ʻo Danny Naipo, ʻo Kamuela Kimokeo, ka Papa ʻUkulele a me ka Hālau o Nūhōlani. A alu like ihola lākou ma ka mālama ʻana i ka ʻahamehele, a i kapa ʻia ʻo “Hawaiʻi no Christchurch”. I ka Pōʻaono nei nō ia, a i ka Lāpule nei, ua mālama ʻia he kaʻi huakaʻi, i kapa ʻia ʻo ke Kaʻi Huakaʻi Aloha, i ka mokeko kahiko loa o Aotearoa, a i laila i waiho ai i nā lei i hoʻokupu.

ʻO Hawaiʻi nō ka ʻoi. ʻO nā Kāne Ānuenue ka helu ʻekahi ma ka pāʻani pōpō paʻipaʻi. Hiki aku nei lākou i ka wēkiu ma hope o ko lākou lanakila ʻana aku nei ma luna o Berigama Iana ma loko o nā pāʻani ʻekolu wale nō. A i ka pō Pōʻalua nei, pēlā ʻo Hawaiʻi i lanakila ai ma luna o Concordia, he ʻekolu wale nō pāʻani, a he ʻekolu lanakila o nā Ānuenue. A i kēia manawa, he 63 a lākou pāʻani i lanakila ai ma hope kekahi o kekahi, a ʻo ia ka nui loa ma ka moʻolelo o ka ʻAhahui ʻĀlapa o nā Kulanui o ʻAmelika Hui Pū ʻIa.

Eia mai kā kākou ʻōlelo noʻeau,

Ola loko i ke aloha.

He mea nui ke aloha. A ʻike ʻia aku nei ma ka hana a ia mau keiki o Hawaiʻi i hele aku nei i Aotearoa.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s