04-03-19

He mau nananana kalanakula kai hoʻopae malū ʻia.

ʻO ia aʻela kekahi poʻo nūhou o kēia lā, ka lā 3 o ʻApelila, he Pōʻakolu. Welina e nā makamaka. ʻO Ke Aolama kēia a penei ka nūhou.

Ma ka ʻĀina Pilipino, ua hoʻopae malū ʻia he 757 mau kalanakula. Aia nō ia mau nananana ma loko o nā pahu mea ʻono kuki a me nā pahu pālaki i wahī ʻia a paʻa i ka pepa makana. Ma ka ʻaoʻao pōmaikaʻi, ua loaʻa nō i nā mākaʻi kuke ma ke Kahua Hoʻolulu Mokulele o Manila. A hopu ʻia ihola ke kanaka nāna i hoʻāʻo e kiʻi aku i ia mau nananana. ʻO ka waiwai ʻiʻo o ia mau nananana, he 310,000 peso, a ma ke kālā ʻAmelika, he $5,900. Ma ka ʻĀina Pilipino, pāpā ʻia ke kūʻai ʻana, ka hōʻiliʻili ʻana a me ka loaʻa ʻana o ia ʻano nananana me ka loaʻa ʻole o ka palapala ʻae.

Ua ʻeha kūpilikiʻi ihola kekahi ʻelemakule e holo paikikala ana ma Kalihi i ka ʻauinalā o ka Pōʻalua nei. He 60 ona makahiki, a kohu mea lā, hoʻokuʻi akula ʻo ia i kekahi mea a i ia manawa, holo wale aku ka paikikala, hina ihola ua ʻelemakule lā a pā ihola kona poʻo i ke kīpapa. Lawe ʻia akula ʻo ia i ka haukapila a ma laila ʻo ia kahi i make ai. A i make nō i kona mau ʻeha i ka hāʻule ʻana ma kona paikikala.

E komo hou ana ʻo Max Holloway i loko o ka pahu mokomoko i ka lā 13 o ʻApelila ma ʻAkalana. ʻO kona hoa paio o ia lā, ʻo ia ʻo Dustin Poirier. E kū ana lāua he alo a he alo no ka inoa moho kūikawā ma ka māhele 146 paona. ʻElua manawa a Poirier i mokomoko ai me kahi kanaka o Hawaiʻi nei, a he ʻelua ona manawa i lanakila ai. ʻO Holloway kekahi i hāʻule iā Poirier a ʻo Yancy Medeiros o Mākaha kekahi. A e lana ana ka manaʻo o Holloway, ʻaʻole e lilo hou ke eo iā Poirier. ʻO Holloway ka inoa moho o ka māhele 136 i kēia manawa. A inā kāʻili ʻo ia i ka lanakila ma ka lā 13 o ʻApelila, ʻo ka lua ana ia o ka inoa moho. He ʻehiku wale nō mea mokomoko i hana pēlā ma ka moʻolelo o ka UFC. A he ʻehā wale nō mea mokomoko i hana pēlā i ka wā like.

Eia mai kā kākou ʻōlelo noʻeau,

Nā keiki uneune māmane o Kula.

He ʻōlelo kēia no ka ʻeleu o nā kānaka o Kula ma ka hoʻokō ʻana i kā lākou hana e hoʻomaka ai.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s