04-05-19

He ulia kaʻa mānaʻonaʻo ma Makiki.

ʻO ia aʻela kekahi poʻo nūhou o kēia lā, ka lā 5 o ʻApelila, he Pōʻalima. Welina e nā makamaka. ʻO Ke Aolama kēia a penei ka nūhou.

He ulia kaʻa kai ʻike ʻia aku nei i ke aumoe nei ma ka huina o nā alanui Pensacola me Mōʻī. Hoʻokahi kanaka i make, a he ʻelua mau kānaka i ʻeha kūkonukonu. E holo nui ana ke kaʻa o kekahi kanaka, a holo wale i ia huina me ke kū ʻole ʻana i ke kukui ʻulaʻula, a hoʻokuʻi akula ʻo ia i kekahi kaʻa. He ʻelemakule ka mea kalaiwa o ke kaʻa i hoʻokuʻi ʻia. A ʻo ia ʻelemakule kekahi o nā mea i ʻeha kūkonukonu. A ʻo ka mea kalaiwa o ke kaʻa holo nui, ʻaʻole i hiki ke hoʻomaopopo ʻia ma muli o kona pāpaʻa loa i ke ahi. A ʻo ia ka mea i make. ʻO kekahi kanaka, ua loaʻa nō ma ka huina o nā alanui o Pelekania me Victoria, a i manaʻo ʻia, he ʻōhua ʻo ia no loko mai o ke kaʻa e kalaiwa ʻia ana e ka ʻelemakule. ʻO ia ʻōhua, ua wela kona kino i ke ahi a pohole nō hoʻi kona ʻili. A lawe ʻia ka ʻelemakule me ia ʻōhua i ka haukapila ma ke kūlana kūkonukonu.

Hoʻomoe ʻia iho nei kahi pila e pāpā ana i nā kikaliki uila o nā ʻono like ʻole a pēlā pū me nā wai ʻono o ke kikaliki uila. ʻO ke kumu i hoʻomoe ʻia ai ua pila nei, manaʻo ihola nā lunamakaʻāinana o ke Komike ʻOihana Kālā, he hiki nō i nā ʻōpiopio ke kūʻai i ia mau mea ma ka pūnaewele. Wahi a nā lunamakaʻāinana kākoʻo i ia pila, he pono ia pila ma muli o ka māhuahua loa ʻana o nā ʻōpiopio puhi kikaliki uila. Inā i hele loa a ʻāpono ʻia ua pila nei a lilo i kānāwai, inā ua lilo ʻo Hawaiʻi, ʻo ia ka mokuʻāina mua nāna e hana pēlā ma ʻAmelika Hui Pū ʻIa a puni. Ua ʻāpono naʻe ke Komike ʻOihana Kālā i kekahi pila e hoʻopiʻi ana i ka hoʻopaʻi inā he kikaliki uila ma ka malu o kahi ʻōpiopio. A hoʻopiʻi ʻia nō hoʻi ka ʻauhau o nā kikaliki uila a me nā wai o ke kikaliki uila.

Eia mai kā kākou ʻōlelo noʻeau,

He kēhau hoʻomaʻemaʻe ke aloha.

ʻO ke aloha ka mea e pau ai ka ʻeha o ka naʻau.

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s