Hoʻohanohano ʻia kekahi mau puʻukani o Hawaiʻi nei.
ʻO ia aʻela kekahi poʻo nūhou o kēia lā, ka lā 8 o ʻApelila, he Pōʻakahi. Welina e nā makamaka. ʻO Ke Aolama kēia a penei ka nūhou.
ʻAʻole i hiki ke loaʻa i ke kinai ahi kekahi kino kupapaʻu e lana ana ma ke kai o Hanalua ma Kohala ʻĀkau. I ka hiki ʻana aku o ka mokulele pinao me nā kinai ahi, ʻike ʻia akula he manō e holo ana a puni ke kino. Hoʻāʻo ihola nā kinai ahi e kiʻi a loaʻa ke kino me kekahi ʻupena, ʻaʻohe wahi mea a loaʻa o ke kino ma muli o kona wahi e waiho wale ana. A ma hope, nalowale ihola ke kino. Na ua iʻa nui lā i lawe iho i lalo o ka ʻili o ke kai. Noke aʻela ka mokulele pinao e ʻimi aku, ʻaʻole naʻe i ʻike hou ʻia. Ma luna o ka pali, loaʻa akula i ka mākaʻi kahi ʻeke hāʻawe a me kekahi mau mea pilikino i manaʻo ʻia na ka mea make.
Kau aku nei i ka hano hāweo kekahi mau puʻukani o Hawaiʻi nei. E hoʻohanohano ana ka Holo Kaulana o ke Mele Hawaiʻi iā Alice Namakelua, Chick Daniels, Hilo Hattie, Alfred Apaka, Gabby Pahinui, Don Ho a me Israel Kamakawiwoʻole. Aia nō ma ka hale ʻaina ʻo Cheeseburger in Paradise ma ke alanui ʻo Kalākaua. E kau ana ma ka paia nā kiʻi o lākou, nā moʻolelo a me nā pā hoʻohanohano.
I ka pō Pōʻaono nei, lanakila aku nei nā Kāne Ānuenue ma luna o Kana Palapala. Ua hāʻule naʻe ma kekahi o nā pāʻani. He 74 pāʻani o Hawaiʻi i lanakila ai ma hope kekahi o kekahi. A ʻo ia ka nui loa ma ka moʻolelo o ka ʻAhahui ʻĀlapa Kulanui o ʻAmelika Hui Pū ʻIa. Ma muli o ka maikaʻi wale o ka hana a nā Ānuenue, ua paʻa nō ke komo ʻana o Hawaiʻi, ʻo ia ka helu ʻekahi a helu ʻelua paha, i loko o ka hoʻokūkū inoa moho o ka ʻAhahui Komohana Nui. ʻO Kekaha Loa kekahi. A e hui pū ana ia mau hui ʻelua he alo a he alo i ka lā 12 o kēia mahina nei.
Eia mai kā kākou ʻōlelo noʻeau,
He ʻūlei kolo.
He ʻōlelo kēia no ke kanaka ikaika.
Ke Aolama 