He kumu kula no Honolulu nei ke lilo i mea hana keaka ma Broadway.
ʻO ia aʻela kekahi poʻo nūhou o kēia lā, ka lā 12 o ka mahina ʻo ʻApelila, he Pōʻalima. Welina e nā makamaka. ʻO Ke Aolama kēia a penei ka nūhou.
ʻAʻole paha e hoʻokohu hou ʻia ʻo Nolan Espinda, ʻo ia ka luna o ke Keʻena Maluhia o ka Lehulehu. Holo ihola ka manaʻo o ke Kōmike o ka ʻAha Kenekoa o Hawaiʻi nei i ka Pōʻahā nei, ʻaʻole ʻo ia e hoʻomau ʻia ma ia kūlana hana. ʻO kekahi mau kumu i hōʻole ʻia ai ʻo Espinda, ʻo ka haunaele i ala aʻela ma ka hale paʻahao o Maui, ke kī pū ʻia ʻana o kekahi paʻahao o Oʻahu nei a me kekahi kanaka kuewa, a me ka mau ʻana o ka noho paʻahao o kekahi mau paʻahao ma hope o ko lākou wā hoʻokuʻu. I kēia pule aʻe, e koho pāloka ana ka ʻAha Kenekoa piha i ka hoʻomau a me ka hoʻomau ʻole paha o Espinda ma ia kūlana.
E lilo ana kekahi kaikamahine Hawaiʻi, ʻo ia ʻo Jasmine ma ka hana keaka ʻo Aladdin ma Broadway. ʻO Kaena Kekoa kona inoa, a he kumu kula ʻo ia ma ke Kula ʻo Waolani Judd Nazarene i Nuʻuanu. Aia ana kona lā hana keaka mua ma ia hana keaka ma Salt Lake City i kēia mahina nei.
Eia mai kā kākou ʻōlelo noʻeau,
Laʻi lua ke kai.
ʻO ia hoʻi, ua maluhia.
Ke Aolama 