He ulia mokulele ma Oʻahu nei.
ʻO ia aʻela kekahi poʻo nūhou o kēia lā, ka lā 17 o ʻApelila, he Pōʻakolu. Welina e nā makamaka. ʻO Ke Aolama kēia a penei ka nūhou.
He ulia mokulele pinao kai ʻike ʻia ma Hauʻula i ka Pōʻalua nei. Ma ka ʻaoʻao pōmaikaʻi naʻe, ʻaʻohe ola i pōʻino. He ʻehā mau kānaka o luna o ka mokulele pinao. A hoʻokahi wale nō paha kanaka i ʻeha ihola. Ua pohole kona lima. A ʻo lākou a pau, ua hōʻole i ka lapaʻau ʻana. I piʻi aku kekahi mau kānaka i uka no ka noiʻi ʻana i ke kani a nā manu kai. A pau ihola kā lākou hana, ua kiʻi ʻia e ka mokulele pinao. ʻAʻole i liʻuliʻu ka lele ʻana o ka mokulele, pau ihola ka uila. A ʻo ke kuʻu ʻino ihola nō ia. He keu lākou lā a ka pōmaikaʻi.
Ua pau ihola kekahi māhele o ka Hale Pule Pope ʻo Notre Dame i ke ahi. ʻAʻole naʻe i pau kona mau pūʻoʻa pele ʻelua. E hōlapu ana ke ahi he 12 mau hola i ka Pōʻakahi nei. A ʻo ka hana i kēia manawa, ʻo ia ka hana ʻana i mea e pilikia ʻole ai ʻo loko i ka ua a me ka makani paha, ʻoiai, ua pau ke kaupoku i ke ahi. A ʻo nā mea i koe, ʻo ka lehu, a ʻo nā ʻāpana paia paha, he mea nui no ke kūkulu hou ʻia o ka Notre Dame. Ua palapala pono ʻia a paʻi kiʻi pono ʻia nō hoʻi ua hale pule lā. A no laila, he hiki ke kūkulu hou ʻia akā, he wā lōʻihi loa ana nō.
Eia mai kā kākou ʻōlelo noʻeau,
Aia ke ola i ka hana.
Ma ka hana e loaʻa ai nā mea e pono ai ke ola.
Ke Aolama 