Maikaʻi wale ka pāʻani ʻana a Stijn van Tilburg i ka Pōʻaono nei.
ʻO ia aʻela kekahi poʻo nūhou o kēia lā, ka lā 24 o ʻApelila, he Pōʻakolu. Welina e nā makamaka. ʻO Ke Aolama kēia a penei ka nūhou.
Ua moku ka wāwae o kekahi wahine i ka manō ma ke Kai Kūʻono o ʻAnaehoʻomalu i ke kakahiaka o nehinei. No Kaleponi ua wahine lā, a aia ʻo ia e hoe waʻa kaiaka ana ma ʻAnaehoʻomalu a aia kāna kāne e hoe papa ana. I ka manawa o ka wahine e hoe ana he mau haneli ʻīā mai ke kahaone aku, nahu ʻia aʻela kona wāwae. Pōmaikaʻi ia wahine i ke alu like ʻana o nā kānaka a pae maila i uka. Lapaʻau ʻia ihola i laila a lawe ʻia aʻela i ka haukapila ma ka mokulele pinao. ʻO ka hā wale nō kēia o ka manawa i ʻeha ai ke kanaka i ka manō i kēia makahiki nei, a ʻo ka lua ma ʻAnaehoʻomalu. ʻO ka pōmaikaʻi, ʻaʻohe ola i pōʻino.
Kau aʻela ʻo Stijn van Tilburg i ka hano hāweo i ka Pōʻakahi nei. Koho ʻia iho nei ʻo ia, ʻo ia ka mea pāʻani ʻoi o ka pule ma ke kinipōpō paʻipaʻi. Ma muli ia o ka maikaʻi wale o kāna pāʻani ʻana ma ka Pōʻaono nei i hala ma ke kūʻē ʻana aku iā Kekaha Loa ma ka hoʻokūkū inoa moho o ka ʻAhahui Komohana Nui. Ua lilo ke eo iā Hawaiʻi ma loko o nā pāʻani ʻelima. I ia ahiahi, he 25 hoʻopio a van Tilburg. A lilo akula iā ia ka makana Mea Pāʻani Kāʻeʻaʻeʻa o ka Hoʻokūkū. Ma ka moʻolelo o ke Kulanui o Hawaiʻi, ʻo van Tilburg ka helu ʻehiku ma ka hoʻopio, he 1,388. I kēia manawa, ʻo Jason Olive ka helu ʻeono, he 1,418 āna hoʻopio, a ʻo Josh Walker ka helu ʻelima, he 1,428 āna hoʻopio.\
Eia mai kā kākou ʻōlelo noʻeau,\
Komo mai kāu māpuna hoe.
ʻO ia hoʻi, e kōkua.
Ke Aolama 