04-26-19

Hoʻopiʻi ʻia aku he mākaʻi a me ke Keʻena Mākaʻi.

ʻO ia aʻela kekahi poʻo nūhou o kēia lā, ka lā 26 o ʻApelila, he Pōʻalima. Welina e nā makamaka. ʻO Ke Aolama kēia a penei ka nūhou.

Hoʻopiʻi akula kekahi wahine i kāna kāne, iā Darren Cachola, he mākaʻi, no ka hoana ʻana e hōʻeha iā ia i ka makahiki 2017. A hoʻopiʻi nō hoʻi ka wahine iā Cachola, ke Keʻena Mākaʻi, nā mākaʻi Kevin Bailey me Thomas Taflinger, Cary Okimoto ka hope luna ma mua, ka luna mākaʻi kūikawā hoʻi i ia manawa i limanui ʻia ai ka wahine, a me kekahi mau kānaka ʻē aku no ka mālama ʻole, ka ʻōhumu, a me ka hoʻokūpilikiʻi. I kēia manawa, aia nō ʻo Cachola me kāna wahine e ʻoki male ana a ua hoʻokaʻawale ʻia lāua ʻaʻole noho pū. Ua ʻōlelo ʻia ma ka hihia, e hana ana ka wahine a Cachola ma ka hale ma kāna kamepiula hele a i ia manawa, hiki maila ʻo Cachola a kohu mea lā, ua ʻona loa ʻo ia. Haʻi maila ʻo Cachola i ka wahine e hoʻopio ʻia ke kamepiula hele. I ka wā i hōʻole ai ka wahine, ʻumi ihola ʻo Cachola i ka wahine. I ka hiki ʻana mai o ka mākaʻi, haʻi maila ʻo ia inā e hoʻopiʻi ka wahine iā Cachola, e ʻike auaneʻi nā ʻoihana kūkala nūhou a e hoʻouluhua ʻia ʻo ia ma kona hale a me kona wahi hana, a e hele a “pupuka” a e hoʻohilahila ʻia ʻo ia. ʻO Bailey ia mākaʻi, a noi nō hoʻi ʻo Bailey a me kekahi mākaʻi, e kākau ʻo ia i kēia ʻōlelo, “Ua hoʻopaʻapaʻa au me kaʻu kāne. ʻAʻohe oʻu ʻeha, mahalo.” Pēlā ka ʻōlelo ma ka hihia. I ia lā, ʻaʻole i hopu ʻia ʻo Cachola a ʻaʻole nō hoʻi i paʻi kiʻi ʻia nā ʻeha o ka wahine.

Eia mai kā kākou ʻōlelo noʻeau,

Wī ka niho o ka ʻiole.

Ua loaʻa pono akula ke kolohe, a kau ma kahi e hiki ʻole ai ke hoʻopilikia hou i kekahi.