He ulia mokulele pinao ma Kailua.
ʻO ia aʻela kekahi poʻo nūhou o kēia lā, ka lā mua o Mei, he Pōʻakolu. Welina e nā makamaka. ʻO Ke Aolama kēia a penei ka nūhou.
Ua kuʻu ʻino ihola kekahi mokulele pinao ma ke Alanui ʻo Oneawa i ka Pōʻakahi nei. He ʻekolu mau kānaka o luna o ua mokulele pinao lā. ʻO ka pailaka, ʻo ia ʻo Joseph Berridge. Hōʻike maila ke Keʻena Kolonelo o Honolulu, ʻo Ryan McAuliffe kekahi o nā wāhine ʻelua o luna o ia mokulele. A ma ke kūkala nūhou o ʻAukekulelia, hōʻike kekahi ʻohana o ka lua o ka wahine, ʻo Jan Burgess ka inoa o ka lua o ka wahine. ʻO ia wale nō nā mea i pōʻino. ʻAʻohe kanaka i ʻeha. I nehinei, ua hoʻomaka ka lawe ʻia ʻana o nā ʻāpana mokulele pinao e waiho wale ana i kahi ʻē.
Paʻa ihola ka hoa paio o nā Kāne Ānuenue ma ka puni ʻelua o ka Hoʻokūkū Inoa Moho Pōpō Paʻipaʻi o ka ʻAhahui ʻĀlapa o nā Kulanui o ʻAmelika. E kūʻē aku ana ʻo Hawaiʻi iā Lewis. Kāʻili aku nei ʻo Lewis i ka lanakila mai nā lima wīkani o ke Kulanui o Kaleponi Hema i loko o nā pāʻani ʻehā ma ka puni mua. E hui pū ana ʻo Hawaiʻi me Lewis ma ke kahua i ka Pōʻahā.
Eia mai kā kākou ʻōlelo noʻeau,
Ahuwale nā pae puʻu o Hāʻupukele.
He ʻōlelo kēia no kekahi mea ahuwale.
Ke Aolama 