05-08-19

He hoʻāʻo ʻaihue kanaka ma ʻEwa.

ʻO ia aʻela kekahi poʻo nūhou o kēia lā, ka lā 8 o Mei, he Pōʻakolu. Welina e nā makamaka. ʻO Ke Aolama kēia a penei ka nūhou.

Aia nō ka mākaʻi ke ʻimi akula i kekahi kanaka no kona hoʻāʻo ʻana e ʻaihue kanaka i kekahi keiki ma ʻEwa. Ma ka ʻaoʻao pōmaikaʻi, ua ʻike kekahi kanaka i ia hana, a komo wale aku me ka manaʻo e kōkua i ke keiki. I ia manawa, hoʻokuʻu akula ke kanaka ʻaihue i ke keiki a haʻalele ihola. Ua hoʻolaha aʻela ka mākaʻi i ke kiʻi o ua kanaka lā. He 30 ona makahiki a ʻoi iki paha, he 5 ona kapuaʻi me 6 ʻīniha a ka ʻeono kapuaʻi paha, a he ʻelua haneli paha paona. He lauoho ʻeleʻele kona, a he ʻumiʻumi me ka ʻumiʻumi pēheuheu nō hoʻi. Ua kākau ʻia ma kona lima hema ka pae ʻāina ʻo Hawaiʻi. A e komo ana ʻo ia i ka pālule uliuli a me ka lole wāwae ʻekekeʻi. ʻO ke kalaka āna e kalaiwa ana, ua hoʻopili pepa lahilahi ʻia nā puka aniani, a he pepa pipili “Aloha” ma ka puka aniani ma hope o ka ʻaoʻao mea kalaiwa. A ua manuheʻu ka pale o hope. Inā he ʻike kāu, e kāhea iā CrimeStoppers ma ka helu 955-8300.

E kalaiwa ana kekahi wahine i ke kaʻa a lele akula ke kaʻa i ke kai ma kahi o ka Hale Ipu Kukui ʻo Aloha i ka pō Pōʻalua nei ma kahi o ka hola 7:25 o ke ahiahi. Ua hoʻopakele ʻia ihola ka wahine a lawe koke ʻia akula i ke keʻena mālama ulia pōpilikia. Aia ia wahine ma ke kūlana kūkonukonu.

Eia mai kā kākou ʻōlelo noʻeau,

Aʻeaʻe mōhala i luna o ke kukui.

He ʻōlelo kēia no ke kanaka i hele a poʻo hina.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s