E piʻi paha kekahi mau ʻauhau no ka pono o ke kaʻa uila kau i ka lewa.
ʻO ia aʻela kekahi poʻo nūhou o kēia lā, ka lā 13 o Mei, he Pōʻakahi. Welina e nā makamaka, ʻo Ke Aolama kēia a penei ka nūhou.
He manaʻo ko ka Meia Kirk Caldwell, e hoʻopiʻi ʻia ka ʻauhau ma ka hōkele, ma nā hale pipiʻi loa o Oʻahu nei a ma ka ʻohi ʻōpala o kauhale. A inā e ʻāpono ʻia aku ia mau hoʻopiʻi ʻauhau e ka ʻAha Kūkā o Honolulu, a laila, e kū ia mau ʻauhau hou ke hiki aku i ka lā mua o ka mahina ʻo Iulai o kēia makahiki nei. A he mea nui ia mau ʻauhau hou, ʻoiai, ʻo ia ke kālā e lawelawe ʻia ai ka hana o kēlā me kēia lā, ka hoʻoponopono ʻana i ke kaʻa uila kau i ka lewa a me nā mea ʻē aʻe e pono ai, ʻo ka uila e holo ai ke kaʻa, a pēlā aku. E hiki koke mai ana ka lā e hoʻomaka ai ke kūlanakauhale i ka uku ʻana no ia mau mea, ʻoiai, e hoʻomaka ka holo ʻana o ke kaʻa uila ma nā mile he 11 i pau i ke kūkulu ʻia, mai Kapolei Hikina a i ke Kahua Pāʻani ʻo Aloha. Ua kuhi ʻia, ma Kēkēmapa o ka makahiki 2020 e hoʻomaka ai ka holo ʻana.
ʻO ka lā kēia e koho ʻia ai ke kiule o ka hihia o Louis Kealoha, ka Luna Mākaʻi ma mua o Honolulu, a me kāna wahine, ʻo Katherine. He 413 mau kānaka i hele aku nei i ka Lumi Pīkake o ka Hale Hōʻikeʻike ʻo Neal S. Blaisdell. ʻO ka Mea Hanohano J. Michael Seabright ka luna kānāwai o ia hihia. A e koho ʻia he 12 mau lālā i kiule a he ʻehā mau pani hakahaka. Ke holo pono ke koho ʻana, i ka lā 22 o Mei a i ka lā 23 paha e hoʻomaka ai ka ʻōlelo hoʻolauna.
Eia mai kā kākou ʻōlelo noʻeau,
E hele aku ana i ka māla a Kamehameha, ʻo Kuahewa.
ʻO ia hoʻi, ke hele nei a nui loa ka papahana.
Ke Aolama 