He kūkala kai hoʻēʻe hoʻopunipuni kai hoʻolaha ʻia.
ʻO ia aʻela kekahi poʻo nūhou o kēia lā, ka lā 22 o Mei, he Pōʻakolu. Welina e nā makamaka, ʻo Ke Aolama kēia a penei ka nūhou.
Hōʻike aʻela ke Kikowaena Kūkala Kai Hoʻēʻe Pākīpika o Oʻahu nei, ʻaʻohe kai hoʻēʻe e hiki mai ana ma ka Moananuiākea. Ma muli ia hōʻole ʻana o kekahi ʻōlelo hoʻopunipuni i hoʻolaha ʻia no kekahi ōlaʻi ikaika ma Iāpana a me ke kai hoʻēʻe. Ua ʻōlelo ʻia ma ia kūkala hoʻopunipuni, he ōlaʻi nona ka ikaika he 8.0 kai nei ihola ma Iāpana ma kahi o Nagasaki. Wahi a nā luna o ia kikowaena, aia nō ke hoʻokolo ʻia nei ia ʻōlelo hoʻopunipuni. Ua hoʻolaha ʻia ka ʻōlelo hoʻopunipuni ma kahi o ka hola 4:00 o ka ʻauinalā o nehinei. ʻŌlelo ihola ʻo Chip McCreery, ke poʻo o ke Kikowaena Kūkala Kai Hoʻēʻe Pākīpika, he nui nā meheu e maopopo leʻa ai, ʻaʻole ia he kūkala ʻoiaʻiʻo, ʻo ia hoʻi, ua nui nā hua ʻōlelo i pela hewa ʻia, a ʻaʻole nā māhele a pau o loko o ke kūkala maʻa mau.
Lilo aku nei ka Makana Hui Hou i ka hui moku ahikao o ke Kulanui o Hawaiʻi i kapa ʻia ʻo Project Imua ma ka hoʻokūkū Hoʻolele Moku Ahikao 2019 o NASA no nā Haumāna. He ʻewalu mahina ka lōʻihi o ia hoʻokūkū. A he kanahā kumamālima mau hui kulanui i komo aku. He 14 mau haumāna o ka hui o ke Kulanui o Hawaiʻi. A ʻo ia mau haumāna, mai ke Kulanui Kaiāulu o Honolulu, ke Kulanui Kaiāulu ʻo Kapiʻolani, ke Kulanui Kaiāulu o nā Koʻolau a me ke Kulanui o Hawaiʻi ma Mānoa. Ua lilo ia Makana Hui Hou iā lākou, a ʻo ka hui helu ʻeiwa nō hoʻi lākou o ia hoʻokūkū. ʻO ka moku ahikao a Project Imua i kūkulu ai, he 10 ona kapuaʻi, a ua lele he 4,338 kapuaʻi. Ua wānana ʻia e Project Imua, he 4,700 kapuaʻi e lele ai. A i ka pae ʻana o ka moku ahikao, lele ihola kahi kaʻa ʻehā huila i lalo a holo aʻela, he koina ia no ka hoʻokūkū. ʻO Hoʻomau ka inoa o ua kaʻa lā. ʻO ke Kulanui ʻo Vanderbilt ka hui helu ʻekahi o ia hoʻokūkū, a lilo akula he $5,000 i ka hui o ia kulanui. A ʻo Kalolaina ʻĀkau ka hui helu ʻelua, a ʻo ka makana, he $2,500.
Eia mai kā kākou ʻōlelo noʻeau,
Eia aʻe ka makani Kona.
ʻO ia hoʻi, ke hele maila kekahi kanaka huhū.
Ke Aolama 