E hoʻolōʻihi ʻia nā hola hana o nā kiaʻi ola o Oʻahu nei.
ʻO ia aʻela kekahi poʻo nūhou o kēia lā, ka lā 5 o Kepakemapa, he Pōʻahā. Welina e nā makamaka heluhelu, ʻo Ke Aolama kēia a penei ka nūhou.
Ma ka ʻAha Kūkā o Honolulu, ua holo mua aku nei kekahi pila e hoʻolōʻihi ana i nā hola hana o nā kiaʻi ola ma nā kahakai o Oʻahu nei. I kēia manawa, ʻo nā hola hana o nā kiaʻi ola, mai ka hola 9:00 o ke kakahiaka a i ka hola 5:30 o ka ʻauinalā. A ma ka pila hou, e hoʻomaka ka hana a ke kiaʻi ola i ka puka ʻana mai o ka lā, a e pau i ka napoʻo ʻana o ka lā. ʻO ka Luna ʻAha Kūkā Kymberly Pine ka mea nāna i hāpai i ka pila, a wahi āna, i nā makahiki he ʻehiku ona e hana ana ma ke ʻano he luna ʻaha kūkā no Honolulu, ua ulu aʻela ke keʻena mākaʻi a me ke keʻena kinai ahi. A ʻoiai hoʻi, ua māhuahua nā kānaka i piholo a make, ʻaʻole naʻe i ulu ka Māhele Kiaʻi Ola.
Aia nō hoʻi kekahi pila ma ka ʻAha Kūkā o Honolulu, e pāpā ana, ʻaʻole e hoʻohana ʻia ka mea ʻea, ʻo ia hoʻi, ʻo ka ipu a pā mea ʻai paha, ʻo ka mea paʻahana paha e ʻai ai, ka mea omo, ke ʻeke ʻea a pēlā aku, inā he hoʻokahi wale nō manawa e hoʻohana ʻia ai. A ua ʻāpono ʻia iho nei i ka Pōʻakolu nei, ʻo ka lua ia o ka ʻāpono ʻana. Hoʻokahi i koe, a ke ʻāpono hou ʻia, ʻo ka lā mua o Ianuali o ka makahiki 2020, ʻo ka lā ia e hoʻomaka ai ka hoʻokō ʻia ʻana o ia kānāwai.
Eia mai kā kākou ʻōlelo noʻeau,
Eia aʻe ka makani Kona.
He ʻōlelo kēia no kahi kanaka huhū e hele mai ana a kokoke.
Ke Aolama 