09-23-19

He ʻai ʻalamihi ka hana.

ʻO ia aʻela kekahi poʻo nūhou o kēia lā, ka lā 23 o Kepakemapa, he Pōʻakahi. Welina e nā makamaka. ʻO Ke Aolama kēia a penei ka nūhou.

Ua hoiʻi i Kālia i ka ʻai ʻalamihi. Mihi aʻe nei kekahi polopeka o ke Kulanui o Hawaiʻi no kāna mau ʻōlelo hoʻohalahala i ke kūlana o ka hoʻonaʻauao ʻana ma nā Kula ʻo Kamehameha. ʻO John Learned ka inoa o ua wahi polopeka lā. Ma kekahi ʻaha kūkā no ka ʻOhenānā Kanakolu Mika, ʻōlelo aʻela ʻo Learned, ua maopopo iā mākou, ʻaʻole kō nā pahuhopu aʻo ma nā Kula Kam. A he haumāna kā mākou e ʻimi nei i ke kekelē laeoʻo, a he kumu hoʻi ʻo ia ma nā Kula Kam, a wahi āna, hoʻopuka ʻo ia i mau haumāna ma kāna papa, i hiki ʻole ke heluhelu. Ma ka pōmaikaʻi, i ka wā a Learned i ʻōlelo ai pēlā, aia ʻo Summer Maunakea, he polopeka nō hoʻi no ke Kulanui o Hawaiʻi, ma laila. ʻO ka hana mua a Learned, he hōʻole i ka manaʻo, he hoʻokae ʻili kāna ʻōlelo i hoʻopuka maila. Mihi nō hoʻi ka Pelekikena David Lassner i ka ʻohana o nā Kula ʻo Kamehameha no ia mau ʻōlelo hoʻokae ʻili me ka hōʻike ʻole ʻana i ka inoa o ka polopeka nāna i hoʻopuka, me ka ʻōlelo pū ʻana aʻe, ʻaʻole ia i kū i ka manaʻo o ke Kulanui o Hawaiʻi a me kona mau luna. A ma ka Lāpule nei, hōʻike aʻe nei nā Kū Kiaʻi Mauna, ʻaʻole i maikaʻi ka hana a Lassner ma ka hoʻoponopono ʻana i ka pilikia, a he mōhai wale nō ʻo Learned e hoʻoponopono ai i ka laha loa o ka hoʻokae ʻili ma ke Kulanui o Hawaiʻi.

ʻElua wale nō hui pōpō paʻipaʻi e kū nei, ʻaʻole i hāʻule i kēia kau nei. ʻO ia ʻo Baylor a me Cal. I ka Pōʻaono nei, ʻo Pitt a me Hawaiʻi kekahi, akā, i ka Lāpule nei, ua hāʻule ʻo Pitt iā Penn State. A ʻo Hawaiʻi, ua eo iā Baylor ma loko o nā pāʻani he ʻekolu wale nō. ʻO Hanna Hellvig o Hawaiʻi. he 12 āna hoʻopio. A koho ʻia ʻo Brooke Van Sickle o Hawaiʻi, ʻo ia kekahi o ka hui ʻoi o ka hoʻokūkū, ʻo ia ka mea kūpale ʻoi. Ma ke kūʻē ʻana iā Baylor, he 10 āna ʻali, a he ʻehā paku. A ma ke kūʻē ʻana aku iā Mikouli, he 14 āna hoʻopio a he ʻelima paku.

Eia mai kā kākou ʻōlelo noʻeau,

Hanini ka wai o Kūlanihākoʻi.

He ʻōlelo kēia no ka wā ua. A no ka wā paha e heleleʻi ana ka waimaka.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s