09-25-19

ʻAihue ʻia aku nei he mau kumu lāʻau i Haleʻiwa.

ʻO ia aʻela kekahi poʻo nūhou o kēia lā, ka lā 25 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Ua ʻaihue ʻia aku nei he ʻekolu mau kumu milo ma ka Pāka Kahakai ʻo Aliʻi i Haleʻiwa. ʻAkahi nō a kanu ʻia iho ia mau kumu lāʻau i kēia mahina nei. A i ka lā 14 a 15 paha i ʻaihue ʻia aku ai. ʻO ka waiwai ʻiʻo o ia mau kumu milo ʻekolu, he $3,500. Wahi a nā luna kūlanakauhale, e kanu hou ʻia ana he mau kumu ma nā mākālua e waiho wale ana nō. ʻO ia mau kumu milo i kanu ʻia, he māhele ia no kekahi papahana a ka Meia Kirk Caldwell, ʻo ia hoʻi, he 100,000 mau kumu lāʻau e kanu ʻia ke hiki aku i ka makahiki 2025 a e hoʻomāhuahua i ka malu o nā kumu lāʻau o nā kūlanakauhale o Oʻahu nei, he 35% ke hiki aku i ka makahiki 2035. A no laila, he 72 mau kumu lāʻau i kanu ʻia ma nā pāka kahakai ʻekolu, ʻo ia hoʻi, ʻo ke Kaikūʻono o Kaiaka, ʻo Aliʻi o Haleʻiwa, a me ka Pāka Kahakai ʻo Haleʻiwa. Ua kanu ʻia nō hoʻi, he 46 mau kumu lāʻau ma ke Alanui ʻo Halekoa, he 11 ma Hanauma, he 96 ma ka Pāka ʻo Ala Moana, he 28 ma Honolulu Hale a he 56 ma ke Alanui ʻo Anania.

Kākoʻo ka Lunamakaʻāinana Ed Case i ka noiʻi ʻana i ka hoʻopau ʻana i ka Pelekikena Donald Trump mai ka ʻoihana aku. Wahi a Case, he kūpono ia hana ma muli o ka hoʻohuoi, he ʻōnoʻonou kā Trump iā Ukalena e noiʻi i ka hana a Joe Biden, ka hope pelekikena ma mua, a ʻo ia kekahi o nā moho Kemokalaka e alualu ana i ke kūlana pelekikena. Ma mua, ua kānalua ʻo Case no ke kākoʻo ʻana i ka noiʻi ʻana i ka hoʻopiʻi luna nui. ʻO ka Lunamakaʻāinana Tulsi Gabbard, he kūʻē i ia noiʻi ʻana. Wahi āna, ua mahae lua ʻo ʻAmelika Hui Pū ʻIa, a he mea ia noiʻi ʻana e ʻoi aku ai ia mahae lua.

Eia mai kā kākou ʻōlelo noʻeau,

He ʻōpū hālau.

ʻO ia hoʻi, he kanaka lokomaikaʻi a heahea.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s