09-27-19

Hopu ʻia kekahi mau aloha ʻāina ma Waimānalo.

ʻO ia aʻela kekahi poʻo nūhou o kēia lā, ka lā 27 o Kepakemapa, he Pōʻalima. Welina e nā makamaka. ʻO Ke Aolama kēia a penei ka nūhou.

He mau kiaʻi e kūpaʻa ana ma hope o ka ʻāina ma ka Pāka Kahakai o Waimānalo i ka Pōʻahā nei. He papahana ko ke kūlanakauhale kahi e kūkulu ʻia ai kekahi māhele o ka ulu lāʻau ʻo Sherwood. E hoʻolilo ʻia ana ia māhele i kahua pāʻani a i wahi kūkulu kaʻa nō hoʻi. Ma muli o ke aloha i ka ʻāina i ʻākoakoa ai kekahi mau kānaka ma ke ala i ka pāka. A me ka maluhia nō lākou i noho ai ma waena o ke ala no ka hōʻike ʻana i ko lākou aloha i ia ʻāina. A aloha nō, he 28 mau kānaka i hopu ʻia e ka mākaʻi. Akā, ʻo kekahi mea maikaʻi, ua waiho ʻia he hoʻopiʻi i mua o ka ʻAha Hoʻokolokolo ʻĀpana o ʻAmelika Hui Pū, e noi ana i ka hoʻopau ʻana i ke kūkulu ʻia ʻana he kahua pāʻani nunui ma ka Pāka Kahakai o Waimānalo. E kuhikuihi ana ia hoʻopiʻi i ka hoʻokō ʻole o ke Kūlanakauhale a me ke Kalana o Honolulu i ke kānāwai a e kuhikuhi ana nō hoʻi i nā hana like ʻole i kū i ka hewa no ia kūkulu ʻana.

He hana keaka ʻōlelo Hawaiʻi hou ke hana ʻia ana ma ka Hale Hana Keaka ʻo Kennedy ma ke Kulanui o Hawaiʻi i Mānoa. ʻO “ʻAuʻa ʻIa: Holding On” ka inoa a na Tammy Hailiʻōpua Baker i haku i ia hana keaka. ʻO Baker, he polopeka ʻo ia no ke Keʻena Hana Keaka o ke Kulanui o Hawaiʻi ma Mānoa. A ʻo lāua ʻo kāna kāne, ʻo Kaliko Baker, nā mea nona ka Hālau Hanakeaka. He ʻelima wale nō lā e hana ʻia ai nei hana keaka, ʻo ʻAuʻa ʻIa. ʻO ka lā mua kēia a ma ka Pōʻaono nō hoʻi. E hoʻomaka ka hana keaka i ka hola 7:30 o ke ahiahi. A ma nā lā 4 me 5 o ʻOkakopa, e hoʻomaka i ka hola 7:30 o ke ahiahi. A ma ka lā 6, ka lā hope hoʻi, e hoʻomaka i ka hola 2:00 o ka ʻauinalā. He $25 o ka likiki, a emi mai no ka poʻe ʻelemākule, ka poʻe pūʻalikoa, a me nā limahana a me nā kumu o ke Kulanui o Hawaiʻi, he $22. He $20 no nā lālā UHAA, he $15 no nā haumāna, a he $8 no nā haumāna o ke Kulanui o Hawaiʻi i Mānoa. Ma nā lā 1, 2, me 3 o ʻOkakopa, e hana ʻia ana no nā haumāna kula kiʻekiʻe a me ke kula waena paha, e leka uila i ka pahu leka uila, ktkeaka@hawaii.edu, a i ʻole ia, e kāhea aku i ka helu 808-956-3229 i mea e ʻike ai i nā hola e hoʻomaka ai.

Eia mai kā kākou ʻōlelo noʻeau,

Pao ka lima, ʻae ka waha.

He ʻōlelo kēia no ke kanaka e hoʻopaʻa ʻōlelo ana i kekahi hana me ka ʻae pū ʻana i ka uku kīpē no ia hana.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s