Piha hauʻoli paha nā haumāna ʻālapa o nā kulanui o Kaleponi.
ʻO ia aʻela kekahi poʻo nūhou o kēia lā, ka lā 30 o Kepakemapa, he Pōʻakahi. Welina e nā makamaka. ʻO Ke Aolama kēia a penei ka nūhou.
Inā ʻaʻole paha ʻoukou i naue aku i Mānoa e nānā aku ai i ka hana keaka hou i kapa ʻia ʻo “ʻAuʻa ʻia: Holding On”, he ʻekolu mau lā koe, ʻo ia hoʻi, ka Pōʻalima, ka Pōʻaono a me ka Lāpule. I ka Pōʻalima a me ka Pōʻaono, i ka hola 7:30 o ke ahiahi e hoʻomaka ai. A i ka Lāpule, i ka hola 2:00 o ka ʻauinalā e hoʻomaka ai. Aia ma ka Hale Hana Keaka ʻo Kennedy ma ke Kulanui o Hawaiʻi i Mānoa. E hele aku i www.etickethawaii.com e kūʻai ai i ke kikiki.
Pūlima aku nei ke Kiaʻāina o Kaleponi, ʻo Gavin Newsom, i kānāwai hou e ʻae ana i nā ʻālapa kulanui e hai i ʻākena a e lilo ke kālā iā lākou no ko lākou kākoʻo ʻana i kekahi hui ma ka hoʻolaha a ma kekahi hana paha. ʻO ka mea ʻāpiki, ʻo Kaleponi ka mokuʻāina mua o ʻAmelika Hui Pū ʻIa i hana pēlā. E hoʻomaka ka hoʻokō ʻia ʻana o ua kānāwai lā ke hiki aku i ka makahiki 2023. Ma ia kānāwai, e ʻae ʻia nā haumāna o nā kulanui aupuni a me nā kulanui uku o Kaleponi, e hana i ʻaelike me nā hui kāmaʻa lole, nā hui koloaka a me nā ʻano hui like ʻole paha a e lilo ke kālā i ia mau haumāna, e like hoʻi me nā ʻālapa loea. Wānana aʻela ʻo Newsom, e hana like ana kekahi mau mokuʻāina. A ʻakahi nō a kūkala aʻe kekahi mau luna kau kānāwai o Kalolaina Hema, he manaʻo ko lāua e hana i kānāwai like. Ua noi aku ka ʻAhahui ʻĀlapa o nā Kulanui o ʻAmelika Hui Pū ʻIa iā Newsom i ka wiko ʻana i ka pila, no ka mea, e ʻoi aku ana nā pōmaikaʻi o nā kulanui o Kaleponi ma ka hoʻohei ʻana i nā haumāna ʻālapa.
ʻĀhaʻi aku nei ʻo Hawaiʻi i ka lanakila i ka Pōʻaono nei. ʻO Nevada ka hoa paio, a ʻo ka hoa paio mua ia no loko mai o ka ʻahahui hoʻokahi nō, ʻo ia hoʻi, ʻo Mauna Komohana. ʻO ka helu ʻai, he 54 a Hawaiʻi i ka 3 a Nevada. ʻO Cole McDonald, he 312 āna ʻīā i nou ai. Ma ka holo ʻana, he 63 ʻīā a Fred Holly III, a he 123 ʻīā a Jason-Matthew Sharsh ma ka ʻapo ʻana. Ua maikaʻi nō hoʻi ka hana a ka ʻaoʻao kūpale a me ka hui kūikawā.
Eia mai kā kākou ʻōlelo noʻeau,
Lehu ke poʻo i ka uahi o ka hoʻoilo.
He ʻōlelo kēia no ke kanaka kiʻinoho.
Ke Aolama 