He kaʻi like e kūʻē ana i ka hoʻopōʻino kūloko.
ʻO ia aʻela kekahi poʻo nūhou o kēia lā, ka lā 2 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.
E kaʻi like ana kānaka no ke kūʻē ʻana aku i ka hōʻeha a hoʻopōʻino kūloko. ʻO ia ke Kaʻi Like O Nā Kāne No Ke Kūʻē I Ka Hoʻopōʻino, a ʻo ka makahiki 25 kēia o kona mālama ʻia ʻana. I kēia Pōʻahā nō, ka lā 3 o ʻOkakopa, e mālama ʻia ai. I ka hola 11:30 o ke awakea e hoʻomaka ai ke kaʻi ʻana ma ʻIolani Hale. ʻO kekahi pahuhopu, ʻo ia ka hoʻomaopopo ʻana aku i ka lehulehu no ka laha loa o ka hoʻopōʻino kūloko ma ka hale a me kahi hana. Hana ʻino ʻia he 20% o nā wāhine makua e ka mea kūloko ma kahi hana. A he 25% o nā wāhine makua, e hoʻopōʻino ʻia e ke kāne aloha, ka ipo aloha a hoa pili paha.
Ua hoʻōki ʻia ke kūkulu ʻana ma ka Pāka Kahakai o ke Kaikūʻono o Waimānalo, ma muli o ka loaʻa ʻana mai o kekahi mea. He pōhaku paʻa ka mea i loaʻa mai, a kohu koʻi ke nānā aku. He mea kahiko paha, ʻaʻole paha. ʻAkahi nō a loaʻa mai ia pōhaku ma ka hopena pule nei. Hoʻouna ʻia akula i ke Keʻena Mālama Mea Makamae o ke Au Kahiko me ka ʻAha Kanu Iwi Kupuna o Oʻahu kekahi hōʻike e wehewehe ana no ia pōhaku i loaʻa mai. Ua hālāwai pū ka Meia Kirk Caldwell me ka mea ʻike hana lima o ke au i hala o ke Kūlanakauhale a me kekahi kanaka o ke Kulanui o Hawaiʻi i nui ka ʻike ma ia māhele, a kuhi ʻia, ma kekahi wahi i kālai ʻia ai a lawe ʻia mai i Waimānalo.
Eia mai kā kākou ʻōlelo noʻeau,
Puʻuwai hao kila.
ʻO ia hoʻi, he wiwo ʻole.
Ke Aolama 