E hana ʻia ana he kiʻi ʻoniʻoni huʻe ʻoiaʻiʻo no ka luku wale ʻia ʻana o kekahi mau limahana mahi kō o Hanapēpē.
ʻO ia aʻela kekahi poʻo nūhou o kēia lā, ka lā 7 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.
He mea pohihihi ke kī pū ʻia ʻana o kekahi mau Pilipino hana mahi kō a make i ka makahiki 1924 ma Kauaʻi. I ia manawa, e ʻolohana ana lākou, a ua ʻōlelo ʻia, na kekahi mau Visayana e ʻolohana ana i ʻaihue kanaka i kekahi mau ʻIlokano ʻelua. I ka hiki ʻana aku o nā mākaʻi, hoʻomaka ihola ke kī pū ʻana o nā ʻaoʻao ʻelua, a ʻo ka hopena, he 16 paha Pilipino. Ua holo ka manaʻo o ka ʻAhahui Moʻolelo Pilipino ʻAmelika o Kauaʻi, e noiʻi aku i mea e ʻimi ai a loaʻa kahi i kanu ʻia ai nā limahana mahi kō he 16 i make ma ia lā. A i ka heluhelu ʻana o Stephanie Castillo i kahi moʻolelo i paʻi ʻia ma ka nūpepa Garden Isle no ia noiʻi ʻana, komo ihola ka makemake i loko o Castillo, e hana i kiʻi ʻoniʻoni huʻe ʻoiaʻiʻo no ia moʻolelo pohihihi. ʻO Castillo, he mea hana kiʻi ʻoniʻoni ʻo ia, a lilo aku nei kahi Makana Emmy iā ia. He manaʻo ko Castillo e huʻe ʻia ka moʻolelo piha o ia luku wale ʻia ʻana o ia mau limahana he 16 ma ka nīnauele ʻana i nā kānaka i ʻike maka i ia ki pū ʻana a me nā ʻohana paha o nā mea nāna i ʻike. A ʻo ka pahuhopu, e pau ia kiʻi ʻoniʻoni i ka hana ʻia a e hoʻokuʻu ʻia i ka makahiki 2024, ka makahiki piha haneli ia o ia luku wale ʻana.
Mai hāʻule nā Wāhine Ānuenue ma ka hoʻokūkū pōpō paʻipaʻi. ʻO Cal State Fullerton ka hoa paio, a kāʻili ʻo ia i nā pāʻani mua ʻelua. Ma ka ʻaoʻao pōmaikaʻi, hiu aʻela ʻo Hawaiʻi a kāʻili i nā pāʻani ʻekolu ma ia hope mai. Maikaʻi wale ka hana a Norene Iosia, he 26 āna hānai, he 17 ʻali, a he ʻeiwa hoʻopio. A ʻo Amber Igiede, he 10 āna paku, a he 10 hoʻopio. A ʻo Hanna Hellvig, he 20 āna ʻali, a he 16 hoʻopio. A ʻo Bailey Choy, he 28 āna hānai, a he 16 ʻali.
Eia mai kā kākou ʻōlelo noʻeau,
Puhi niho wakawaka.
He ʻōlelo kēia no ka mākaha a me ka wiwo ʻole o ke koa.
Ke Aolama 