10-09-19

Hoʻopau ʻia aku nei nā pū laipela he nui lehulehu e ka hui ʻo Dick’s Sporting Goods.

ʻO ia aʻela kekahi poʻo nūhou o kēia lā, ka lā 9 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

I ka Pōʻalua nei, hōʻike aʻela ke Keʻena Ola o Hawaiʻi, ua loaʻa aku nei kekahi kanaka i ka maʻi koʻe akemāmā ʻiole. He kanaka makua ia no ka ʻāina ʻē i kipa mai nei i ka mokupuni ʻo Hawaiʻi. ʻO ka hiku ia o ke kanaka i loaʻa i ua maʻi lā. No laila, ke paipai hou ʻia nei ka lehulehu, ke ʻai aku i ka hua ʻai a me ka lau ʻai paha, e nānā pono i ka loaʻa a me ka ʻole o ke kamaloli, a e kaka pono a e holoi paha i ka wai maʻemaʻe e holo ana ma mua o ka ʻai ʻana. Inā e kuke ʻia ana, e paila he 3 minuke a i ka ʻelima minuke paha a i ʻole ia, e hiki aku ʻo loko a i ke kekelē 165 no nā kekona he 15.

Ua hoʻopau aku nei ka hui ʻo Dick’s Sporting Goods i nā pū he nui. He $5 miliona a ʻoi ka waiwai ʻiʻo. ʻO ke ʻano o nā pu i hoʻopau ʻia, ʻo ia ka pū laipela pūʻalikoa hoʻopiha pākahi nona iho. A haʻi mai nei ka luna hoʻokō o ia hui, ʻo Edward W. Stack, ke nūnē nei ia hui i ka pono a me ka pono ʻole o ka hoʻomau ʻana i ke kūʻai pū ma kona mau hale kūʻai he 720 a ʻoi. Wahi a Stack, ma hope o ka luku wale ʻia ʻana ma ke Kula Kiʻekiʻe ʻo Marjory Stoneman Douglas ma Pākalana ma Pololika i ka mahina ʻo Pepeluali o ka makahiki 2018, kahi i make ai he 17 mau kānaka, ua hoʻomaka ihola lāua me kāna wahine, me Donna, e kamaʻilio i ka pono a me ka ʻole o ke kūʻai ʻia ʻana o nā pū i like ke ʻano me ka AR-15 a me kekahi mau ʻano pū pūʻalikoa. Ua lohe lāua, ʻo ka mea nāna ia luku wale ʻana, ua kūʻai mai ʻo ia i pū mai ka hale kūʻai ʻo Dicks Sporting Goods. ʻAʻole naʻe i hoʻohana ʻia ua pū lā ma ia luku wale ʻana.

Eia mai kā kākou ʻōlelo noʻeau,

ʻO ka ʻOle ia, mai ʻOlekūkahi a ʻOlekūpau.

ʻO ia hoʻi, ʻAʻole. ʻAʻole loa.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s