Kau palena ʻia ka wā e hoʻohana ʻia ai ka Waihona ʻŌpala o Waimānalo ma Kahe.
ʻO ia aʻela kekahi poʻo nūhou o kēia lā, ka lā 11 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.
Ua ʻae aku nei ke Komikina Hoʻomalu ʻĀina, e hoʻomau ʻia ke kanu ʻia ʻana o ka ʻōpala ma ka Waihona ʻŌpala o Waimānalo ma Kahe a hiki i ka lā 2 o ka mahina ʻo Malaki i ka makahiki 2028. Ua noi ke kūlanakauhale i ka hoʻopihapiha i ia waihona a pihaʻū, ʻaʻole naʻe i ʻae ʻia. Wahi a Colleen Hanabusa, ka luna makaʻāinana ma mua o Kalaeloa, Waiʻanae me Mākaha, ʻaʻole i paʻa nā palapala ʻae, e pono ai ka lawelawe ʻia ʻana o ka hana ma ia waihona ʻōpala. A no laila, ua koi hoʻokikina ʻo Richard N. Wurdeman, ka loio a Hanabusa, e hōʻole ke Komikina Hoʻomalu ʻĀina i ka palapala ʻae, a e pani koke ʻia ka waihona ʻōpala a paʻa mau loa. ʻAʻole naʻe i kō. Akā, ua kau palena ʻia nō ka wā e hoʻohana ʻia ai.
Ua kūkala aʻe nei ke Keʻena Mākaʻi o Hawaiʻi Moku, he 4,632 mau hoʻopaʻi i hāʻawi ʻia i nā kānaka ma kahi o nā Kū Kiaʻi Mauna e kūpaʻa nei ma hope o ka ʻāina ma ke ala e hiki ai i Maunakea. Ma muli ia o ka hoʻoikaika ʻana o ke Keʻena Mākaʻi i ka hoʻokō kānāwai ʻana ma nā pule ʻewalu i kaʻa hope aku nei. Ua hoʻopaʻi ʻia no nā ʻano ʻaʻe like ole. Wahi a ke Keʻena Mākaʻi, i hoʻoikaika lākou i ka hoʻokō ʻana i mea e māhuahua aʻe ai ka palekana o nā mea kalaiwa a me nā koʻele wāwae. A he 46 mau kānaka i hopu ʻia no nā ʻano ʻaʻe like ʻole. Hōʻike aʻe nei ka mākaʻi, ʻaʻole i maopopo ka nui o nā Kū Kiaʻi Mauna i loaʻa i ka hoʻopaʻi, akā, wahi a nā Kiaʻi Aloha ʻĀina, ʻo ka hapanui o nā kānaka i loaʻa i ka likiki, ʻaʻole lākou he mau Kū Kiaʻi Mauna.
Eia mai kā kākou ʻōlelo noʻeau,
I kahi ʻē ka mālia, hana i ka makau.
ʻO ia hoʻi, e hana ʻoe a mākaukau ma mua o ka hiki ʻana mai o ka wā ʻino a pōpilikia paha.
Ke Aolama 