ʻAʻole i lilo aku ka inoa moho o Angela Lee.
ʻO ia aʻela kekahi poʻo nūhou o kēia lā, ka lā 14 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.
Ua māhuahua aʻela nā kānaka o Hawaiʻi nei i loaʻa i ka maʻi lele ai. A ʻo nā helu nui loa ia ma nā makahiki he nui i kaʻa hope aku nei. I ka helu ʻia ʻana ma ka makahiki 2018, he 7,732 mau kānaka i loaʻa i ke kalamikia, ʻo ia hoʻi, he 544.3 ma waena o nā kānaka he 100,000. Ma ka makahiki 2008, he 5,972 mau kānaka i loaʻa i ke kalamikia, ʻo ia hoʻi, he 463.6 ma waena o nā kānaka he 100,000. ʻO ka nui o nā kānaka i helu ʻia i ka makahiki 2018, ua loaʻa i ka pala, he 1,496, ua pālua a ʻoi i ko ka makahiki 2008, he 611. He 180 mau kānaka i loaʻa i ke kaokao i ka makahiki 2018 a he 38 wale iho nō i ka makahiki 2008. ʻO kekahi kumu paha i māhuahua ai nā kānaka i loaʻa i ka maʻi lele ai, ʻo ka nui o ka launa ʻana o nā kānaka ma o ka pūnaewele a hele a moe pū.
I ka Lāpule nei, ua kūpale aku nei ʻo Angela Lee o Mililani i ka inoa moho 114.6 paona o ka ONE ma ka mokomoko, a lanakila aku nei ʻo Lee ma luna o Xiong Jing Nan ma ka puni ʻelima. ʻO Jing Nan ka mea mua i eo ai ʻo Lee ma ka mokomoko ʻana ma ke ʻano he loea i kēia makahiki nei. Ua kāʻili nō hoʻi ke kaikunāne o Lee, ʻo ia hoʻi, ʻo Christian Lee, i ka lanakila mai nā lima wīkani o Saygid Guseyn Arslanaliev. He inoa moho nō hoʻi ko Christian Lee, ʻaʻole naʻe i kūpale ʻia iho nei.
Eia mai kā kākou ʻōlelo noʻeau,
ʻAʻohe hua o ka maiʻa i ka lā hoʻokahi.
He pane kēia i ke kanaka ahonui ʻole.
Ke Aolama 