Kākoʻo ke Kiaʻāina Ige e kūkulu ʻia kahi wili makani hana uila hou ma Kahuku.
ʻO ia aʻela kekahi poʻo nūhou o kēia lā, ka lā 16 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.
Kākoʻo ke Kiaʻāina David ʻIge i ke kūkulu ʻia ʻana o nā wili makani hana uila hou ma Kahuku. Aia nō naʻe kekahi mau kānaka, he hui i kapa ʻia ʻo Kū Kiaʻi Kahuku, ke kūpaʻa nei, ʻaʻole e kūkulu ʻia. ʻO ka Pōʻalua nei ka lā ʻekolu a lākou e kū ana no ka pono o ko lākou ʻāina me ko lākou ʻohana ma waho o ka ʻīpuka o ka Pāka Mahiʻai o Kahuku. He manaʻo ko lākou e ʻākeʻakeʻa i ke komo ʻana o nā kalaka e halihali ana i nā mea e pono ai ke kūkulu ʻia ʻana o nā wili makani. Wahi a Liz Rago-Kaʻili, ka waha ʻōlelo o Kū Kiaʻi Kahuku, ʻo ka ʻAhahui Kaiāulu o Hauʻula a me Kahuku, he kūʻē nō i ke kūkulu ʻia ʻana o nā wili makani, akā, e lilo ana kahi puʻu kālā, he $20,000 mai ka hui AES i ka ʻAhahui Kaiāulu o Lāʻie i kēlā me kēia makahiki, pēlā ke kahua pūnaewele o AES, napuamakanihawaii.org. ʻO kekahi kumu e kūʻē ʻia nei nā wili makani hana uila hou, e ʻoi aku ana ka nui ma mua o nā wili makani e kū nei i kēia manawa a e kokoke loa ana i nā hale, nā mahiʻai a me ke Kula Haʻahaʻa o Kahuku.
Eia mai kā kākou ʻōlelo noʻeau,
Hāʻale i ka wai a ka manu.
He ʻōlelo kēia no ke kanaka uʻi.
Ke Aolama 