Hopu ʻia aku nei kekahi mau kānaka hou ma Kalaeloa a me Kahuku.
ʻO ia aʻela kekahi poʻo nūhou o kēia lā, ka lā 23 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.
He mau kānaka hou i hopu ʻia ma Kalaeloa a me Kahuku. I ka hola 12:40 o ke aumoe nei, he ʻehā mau kānaka i hopu ʻia ma Kalaeloa i ka pō Pōʻalua nei. Ua hoʻopaʻa lākou iā lākou iho i ke kaulahao a leki ʻia ko lākou mau pūlima a paʻa pū, a komo ko lākou mau lima i loko o ka paipu PVC, a e moe ana lākou ma ke ala i mea e komo ʻole ai nā kalaka halihali. A i ke kakahiaka nui o kēia lā, he ʻelua mau kānaka hou i hopu ʻia ma Kahuku. ʻO ka nui o nā kiaʻi o Kahuku i paʻa i ka hopu ʻia, he 107. He mea nui ke kapu aloha i nā kiaʻi o Kahuku, a wahi a lākou ʻo ka mea nāna i kua aku i ka pou uila, ʻaʻole ia no loko mai o ia hui.
A ma Honokaona, ua hoʻopau aku nei ke aupuni i kekahi pila i kū ʻole i ka hoi o ka lehulehu. He pila ia no ka hoʻouna ʻana o kekahi kanaka i hoʻohuoi ʻia no kekahi kalaima ma kekahi aupuni kahi ona i hoʻohuoi ʻia ai. ʻO ke kumu i haku ʻia ai ua pila lā, ʻo ka hoʻouna ʻana i kekahi kanaka i hoʻohuoi ʻia nāna kekahi pepehi kanaka ma Taiwana. ʻAʻole naʻe ʻo ia i hoʻouna ʻia aku ʻoiai, ʻaʻohe palapala ʻaelike o nā aupuni ʻelua. ʻO ke kumu i kau ai ka weli o ka lehulehu, ʻo ia hoʻi, inā holo ia pila, e hiki ke hoʻouna ʻia nā kānaka i nā ʻaha hoʻokolokolo o Kina kahi e kū nei ka ʻAoʻAo Komunika i ka moku.
Eia mai kā kākou ʻōlelo noʻeau,
He ʻale kua loloa no ka moana.
He ʻōlelo kēia no ke kanaka ikaika.
Ke Aolama 