10-25-19

He pono paha ke hoʻonohonoho hou ʻia ʻo Maunakea i ʻāina kūkulu ʻia.

ʻO ia aʻela kekahi poʻo nūhou o kēia, ka lā 25 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

Ma muli o nā ʻohe nānā he 13 e kū ihola ma luna o Maunakea a me ko lākou mau keʻena, nā wahi kūkulu kaʻa a me ka wai a me ka uila e holo ana ma laila, he kūkulu kūpono ʻole ia, ʻoiai, he ʻāina hoʻomalu ʻia ʻo Maunakea e ke aupuni mokuʻāina. Pēlā ke noi a Kuʻulei Higashi Kanahele lāua ʻo Ahiena Kanahele i mua o ke Komikina Hoʻomalu ʻĀina. A he pono ke hoʻonohonoho hou ʻia ʻo Maunakea a helu ʻia he ʻāina kūkulu ia ma mua o ke kūkulu hou ʻia ʻana o ia wahi. ʻO ka mea ʻāpiki, ua noi ke Poʻo Nui Bonnie Irwin o ke Kulanui o Hawaiʻi ma Hilo i ke Komikina Hoʻomalu ʻĀina i ka hōʻole i ke noi a nā Kanahele, a e ʻāpono ʻia ka palapala ʻae no ke kūkulu ʻana ma ka ʻāina hoʻomalu ʻia. He wā hōike a kūʻē ko kēia lā no ia hihia i mua o ke Komikina Hoʻomalu ʻĀina. Aia i ka Hōkele ʻo Grand Naniloa ma Hilo.

Ua alu like ka Hui Hoʻohana ʻImi Naʻauao ʻo Ocean Voyages a me ke Keʻena Noiʻi ʻŌpala ma ke Kai o ke Kulanui ʻo Hawaiʻi Pākīpika ma ka ʻohiʻohi ʻana i nā ʻupena e waiho wale ana ma ke Kai Kūʻono o Kāneʻohe. I nā lā 10 me 11 o ʻOkakopa i kiʻi ʻia ai a lawe ʻia mai i uka. ʻO ka nui o ka ʻupena i loaʻa mai, he 12 kaukani paona. ʻO ka hemo ʻana o ia mau ʻupena, he mea ia e ola hou ai ka laupapa.

Eia mai kā kākou ʻōlelo noʻeau,

He ʻūlei kolo.

He ʻōlelo kēia no ke kanaka ikaika.

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s