10-30-19

He kanaka hoʻomāino kūloko.

ʻO ia aʻela kekahi poʻo nūhou o kēia lā, ka lā 30 o ʻOkakopa, he Pōʻakolua. Welina e nā makamaka. ʻO Ke Aolama kēia a penei ka nūhou.

Ua hoʻopiʻi hou ʻia kekahi kanaka, he mākaʻi ma mua, no ka hoʻomāino kūloko. ʻO Ryan Konishi kona inoa. Ua ʻōlelo ʻia, ma ka lā 17 o ʻOkakopa o kēia makahiki nei  ia hana ʻino a Konishi i kekahi ʻohana ona a i kekahi mea e noho ana ma loko o kona wahi noho. I ka wā e hana ana ʻo Konishi ma ke ʻano he mākaʻi, ua hoʻopiʻi ʻia aku nei ʻo ia no ka hoʻomāino ʻana a me ka hoʻoweliweli ʻana i kekahi mau kānaka ʻelua, no loko mai paha o ka ʻohana a o kona wahi noho paha. ʻO kekahi, aia ka hoʻomāino kūloko ma ka mahina ʻo Malaki o ka makahiki 2017. A ʻo kekahi, aia ma ka mahina ʻo Kēkēmapa o ka makahiki 2018. I ka lā 26 o ʻAukake o kēia makahiki nei, hōʻike aʻela ʻo ia i ke kū o nā hewa iā ia. A ma ia lā hoʻokahi nō, ua haʻalele loa ʻo ia i ka ʻoihana mākaʻi. ʻO kona hoʻopaʻi no ia mau hihia ma mua, he noho hoʻomalu no nā makahiki ʻelua, a he 21 lā o ka noho paʻahao ʻana. A kauoha ʻia ʻo ia i ka hele ʻana i ka papa hoʻōki hoʻomāino kūloko a i ka papa no ke aʻo ʻana i ka hana pono a nā mākua mea keiki. A ʻoiai, hoʻopiʻi hou ʻia ʻo ia no ia kalaima hoʻokahi nō i loko o ka makahiki hoʻokahi, inā hoʻāhewa ʻia ʻo Konishi, ʻo kona hoʻopaʻi haʻahaʻa lo,a he noho paʻahao no nā lā he kanakolu, a ʻo ke kiʻekiʻe loa, he noho paʻahao no ka makahiki hoʻokahi a me ka uku hoʻopaʻi he $2,000.

Eia mai kā kākou ʻōlelo noʻeau.

He naio ka loaʻa.

ʻO ia hoʻi, he hoka ka hopena.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s