11-08-19

He hiki i ke aupuni o Hawaiʻi ke hoʻokolokolo hou iā Christopher Deedy.

ʻO ia aʻela kekahi poʻo nūhou o kēia lā, ka lā 8 o Nowemapa, he Pōʻalima. Welina e nā makamaka. ʻO Ke Aolama kēia a penei ka nūhou.

He hiki nō ke hoʻokolokolo hou ʻia aku ʻo Christopher Deedy, he ʻākena kūikawā no ke Keʻena Mokuʻāina o ʻAmelika Hui Pū ʻIa no kona kī ʻana aku iā Kollin Elderts a make i ka lā 5 o Nowemapa o ka makahiki 2011. Pēlā ihola ka ʻōlelo hoʻoholo a ka ʻAha Hoʻokolokolo Kaʻapuni ʻEiwa. Akā, ʻaʻole e hiki ke hoʻokolokolo ʻia ʻo ia no ka lawe ola. Inā no ka limanui ʻana, he hiki nō. I ka manawa mua o Deedy i hoʻokolokolo ʻia ai, ʻaʻole i hiki i ke kiure ke hoʻoholo ma ka pepehi kanaka ma ke kekelē ʻelua. Wahi a nā loio o ke aupuni a me Deedy, ʻaʻole i lawa ka ʻōlelo hōʻike a mea hōʻike paha no ka lawe ola. A ua ʻaelike ka Lunakānāwai Karen Ahn a pēlā ʻo ia i hoʻoholo ai. Ma hope mai o ia hihia, kau aʻela ka ʻōlelo hoʻoholo o ka ʻAha Hoʻokolokolo Kiʻekiʻe o Hawaiʻi, e ʻae ʻia ke kiule e noʻonoʻo no ka pono a me ka pono ʻole o kekahi mau hoʻopiʻi i emi mai ke koʻikoʻi. A no laila, i ka lua o ka manawa o Deedy i kū ai i mua o ka ʻaha no ka pepehi kanaka ma ke kekelē ʻelua, hoʻomaopopo akula ka Lunakānāwai Ahn i ke kiule, he hiki nō iā lākou ke noʻonoʻo i ka pono a me ka pono ʻole o ka lawe ola a me ka limanui kekahi. Ua hoʻokuʻu ʻia ʻo Deedy ma ka pepehi kanaka, akā, ʻaʻole i holo ka manaʻo o ke kiule ma ka lawe ola. A no laila, kauoha aʻela ʻo Ahn e hoʻokolokolo hou ʻia ʻo Deedy no ka lawe ola. Ma ia hope mai naʻe, he mau hoʻopiʻi hou, na Deedy a na ke aupuni kekahi, a kau ka ʻōlelo hoʻoholo a ka ʻAha Kaʻapuni ʻEiwa.

Eia mai kā kākou ʻōlelo noʻeau,

Hele kā hoʻi a hiki i Keālia, ua napoʻo ka lā.

He ʻōlelo kēia no ke kanaka hoʻopaneʻe pinepine i ka hana.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s