Nui nā nīnau o nā luna kau kānāwai no ka piʻi uku makahiki o nā kumu kula aupuni.
ʻO ia aʻela kekahi poʻo nūhou o kēia lā, ka lā 15 o Ianuali, he Pōʻakolu. Welina e nā makamaka. ʻO Ke Aolama kēia a penei ka nūhou.
I ka lā ʻekolu o Kēkēmapa, hōʻike aʻela ke Kiaʻāina David Ige a me nā luna hoʻonaʻauao i ke noi i ka hoʻonui ʻana i ka uku makahiki o nā kumu hoʻonaʻauao kūikawā, nā kumu kula kaiapuni a me nā kumu ma nā kūlana kumu hakahaka pinepine. A ua hoʻomaka nō ka piʻi ʻana o ka uku i ka lā ʻehiku o Ianuali. ʻAʻole naʻe ia i kū i ka makemake o nā luna kau kānāwai. A nīnau ana lākou i ka pono a me ka pono ʻole o ia hana. Hōʻike akula ke Kahu Kula Nui Christina Kishimoto a me ka Luna Hoʻomalu o ka Papa Hoʻonaʻauao, ʻo Catherine Payne, i holo koke ka manaʻo e hana pēlā i mea e pau koke ai ka pilikia ma ka hai ʻana i nā kumu hou a me ka noho paʻa ʻana o nā kumu maikaʻi ma ko lākou kūlana hana.
Ua hoʻomaka iho nei ka ʻimi ʻana i kumu aʻo pōpō pekupeku hou no ke Kulanui o Hawaiʻi. I ka Pōʻakahi nei, hoʻomaopopo aʻela ʻo Nick Rolovich i ka luna ʻālapa o ke Kulanui o Hawaiʻi, iā David Matlin, i ka paʻa o kona manaʻo, e haʻalele loa i ke kūlana kumu aʻo o nā Koa Ānuenue no kona lilo ʻana ʻo ia ke kumu aʻo o Wakinekona Mokuʻāina. E hoʻomaka ka nānā pono ʻana i nā noi kūlana kumu aʻo i kēia Pōʻalua aʻe.
Eia mai kā kākou ʻōlelo noʻeau,
Hele kā hoʻi a hiki i Keālia, ua nāpoʻo ka lā.
He ʻōlelo kēia no ke kanaka hoʻopaneʻe aku i ka hana.
Ke Aolama 
Mahalo no kēia nūhou no ka piʻi (a piʻi ʻole paha) o ka uku makahiki o nā kumu kula kaiapuni. He mea koʻikoʻi nō ia no ka pono o nā haumāna.
LikeLike
eia kekahi, ma nā kula kaiapuni, ʻo “kīnānā” ka huaʻōlelo maʻa mau i hoʻopuka ʻia no ka hoʻonaʻauao kūikawā.
LikeLike