E noho hoʻomalu maʻi ana kekahi mau kānaka o Hawaiʻi nei ma muli o ka mea hoʻomaʻi o Kina.
ʻO ia aʻela kekahi poʻo nūhou o kēia lā, ka lā 12 o Pepeluali, he Pōʻakolu. Welina e nā makamaka. ʻO Ke Aolama kēia a penei ka nūhou.
He mau kānaka ma Hawaiʻi e noho hoʻomalu maʻi ana ma muli o ka mea hoʻomaʻi coronavirus. He 36 ka nui, he 35 o lākou, e hoʻomalu maʻi ana iā lākou iho ma ko lākou wahi ponoʻī. A hoʻokahi kanaka, e hoʻomalu maʻi ʻia ana ʻo ia ma ke kahua moku kaua ʻo Pearl Harbor. A piʻi auaneʻi paha ia huina, ʻoiai, ʻo ke Kahua Hoʻolulu Mokulele o Honolulu, ʻo ia kekahi o nā kahua hoʻolulu mokulele he 11 o ʻAmelika Hui Pū ʻIa i koho ʻia e ke aupuni pekelala, e ʻae ʻia ke kuʻu ʻana o ka mokulele mai Kina mai. He manaʻo ko nā luna ola kino o Hawaiʻi nei, e hiki ana ke nānā ʻia ke koko o ke kanaka no ka ʻike i ka loaʻa a me ka loaʻa ʻole paha o ua mea hoʻomaʻi lā i kēia hopena pule.
Aia nō ke kanu ʻia nei nā mākālua e waiho wale ana ma hope o ka haʻalele ʻana o Nick Rolovich a me nā kumu pōpō pekupeku ʻē aʻe. Ua lilo ʻo Todd Graham ʻo ia ke poʻo kumu hou o ka hui pōpō pekupeku o ke Kulanui o Hawaiʻi. A he ʻekolu mau kumu hou. ʻO ka mua, ʻo ia ʻo Brennan Marion. ʻO ia ke kumu hoʻolaukaʻi kūlele a me ke kumu ʻalihikūlele o ke Kulanui ʻo William a me Mary i ke kau nei i hala. ʻO ia ana ke kumu kōkua kūlele o nā Koa Ānuenue. ʻO ka lua o ke kumu hou, ʻo ia ʻo Brandon Graham, ke keiki hoʻi a Todd Graham. He hope kumu ana ʻo ia ma ka ʻaoʻao kūlele. ʻO ke kolu o ka mea hou, ʻo Laiu Moeakiola kona inoa.
Eia mai kā kākou ʻōlelo noʻeau,
Hanini ka wai o Kūlanihākoʻi.
ʻO ia hoʻi, he ua.
Ke Aolama 