02-19-20

E hoʻolōʻihi ʻia paha ka wā hoʻomalolo kūkulu ʻOhe Nānā Kanakolu Mika.

ʻO ia aʻela kekahi poʻo nūhou o kēia lā, ka lā 19 o Pepeluali, he Pōʻakolu. Welina e nā makamaka. ʻO Ke Aolama kēia a penei ka nūhou.

Noi aku nei ka Meia Harry Kim o Hawaiʻi moku i nā luna o ka ʻOhe Nānā Kanakolu Mika i ka hoʻolōʻihi ʻia o ka wā hoʻomalolo kūkulu ma Maunakea, he ʻelua mahina hou aku. Hōʻike maila ʻo Kim, he manaʻo kona, he wā ia e kūkākūkā ai nā ʻaoʻao ʻelua a holo like ma kahi e pono ai. He hālāwai aku nei ko ka papa kiaʻāina o ia papahana i kēlā pule aku nei. ʻAʻole i lohe iki ʻo Kim i kahi ʻōlelo hoʻoholo a ka papa. Akā, ʻōlelo ihola ʻo Kim, e ʻike ʻia ke kō a me ke kō ʻole paha o kāna noi i ka hopena o kēia pule nei. Wahi a Andre Perez, kekahi o nā Kū Kiaʻi Mauna, ʻaʻole i hoʻomaopopo ʻia nā kiaʻi o Maunakea e Kim a e kekahi paha no ka hoʻolōʻihi ʻia o ia wā hoʻomalolo. A inā ʻaʻole e hana ʻia he wā hoʻomalolo hou, e kū hou nā kiaʻi i ka pono ma ka huina o ke Ala Komo Maunakea a me ke Alaloa ʻo Daniel K. Inouye.

Ua kipa mai nei he paʻa male mai Iāpana mai i kēia paeʻāina nei a i ko lāua hoʻi ʻana aku i Iāpana, ua ʻike ʻia ko lāua loaʻa i ka mea hoʻomaʻi coronavirus. A no laila, noiʻi aku nei nā luna o ke Keʻena Ola i nā kānaka o Hawaiʻi nei i launa pū me ua paʻa male lā no kahi wā lōʻihi. Aia ka paʻa male ma Maui mai ka lā 28 o ka mahina ʻo Ianuali a i ka lā ʻekolu o Pepeluali, a ma O’ahu nei mai ka lā ʻekolu o Pepeluali a ka lā ʻehiku. Akā, ma ka ʻōlelo a ke Keʻena Ola, ʻaʻohe kanaka i launa me lāua lā a lōʻihi. Mai ka Pōʻalua nei, e nānā ana nā luna o ke Keʻena Ola i nā kānaka he 42 i huakaʻi aku nei i Kina, ma ko lākou hale a ma ka lumi hōkele paha no ka loaʻa a me ka loaʻa ʻole paha i ka mea hoʻomaʻi coronavirus. A aia nō kekahi kanaka ke noho hoʻomalu ʻia nei ma ke kahua mokukaua ʻo Pearl Harbor. Aia ʻo ia ma ka mokuʻāina ʻo Hubei, kahi i laha mua ai ke coronavirus.

Eia mai kā kākou ʻōlelo noʻeau,

He ukana ko ka houpo.

ʻO ia hoʻi, he pilikia ke noʻonoʻo ʻia nei.

 

 

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s