ʻO ia mau nō ka lapalapa o ke ahi ma Kahoʻolawe.
ʻO ia aʻela kekahi poʻo nūhou o kēia lā, ka lā 28 o Pepeluali, he Pōʻalima. Welina e nā makamaka. ʻO Ke Aolama kēia a penei ka nūhou.
I ka lā i nehinei, aia nō ke ahi e lapalapa ana ma Kahoʻolawe. I ke kakahiaka Pōʻaono i ʻā ʻia ai ke ahi. Pau iho nei i ke ahi he 6,000 ʻeka ʻāina a ʻoi. A ʻoiai, he nui nā pōkā pahū kahiko e waiho wale ana ma ka hapanui o ia mokupuni, he paʻakikī ka hoʻāʻo ʻana e kinai aku. ʻO kekahi mau mea nō hoʻi i pōʻino i ke ahi, ʻo ka hale e waiho ai nā pono o ke Komikina ʻĀina Hoʻomalu Kahoʻolawe, ka hale hoʻopau pilikia nona ka waihona hoʻopulupulu a me kekahi mau kaʻa i pau ka pono. He ʻelua wahi e hoʻoulu ʻia nei ke kālā no ka pono o Kohemālamalama. Eia mai lāua ʻelua, www.kahoolawe.hawaii.gov/home.php a me www.protectkahoolaweohana.org.
Ua hōʻike aʻela ke Kauka Sarah Park o ke Keʻena Ola o ka mokuʻāina o Hawaiʻi nei, i kēia pule aʻe, e hiki ana ke nānā ʻia ke kanaka no ka loaʻa a me ka loaʻa ʻole paha i ka mea hoʻomaʻi coronavirus. Ua hoʻouna mai ke Kikowaena Hoʻomalu Maʻi i Hawaiʻi nei, i mau hōkeo e ʻike ʻia ai ka loaʻa o ke kanaka i ua maʻi lā, ua pilikia naʻe ia mau hōkeo, a ʻaʻole i hiki ke hoʻohana ʻia. ʻO nā kānaka i loaʻa i ua maʻi lā a puni ka honua, he 82,000.
Eia mai kā kākou ʻōlelo noʻeau,
ʻAʻohe pueo keʻu, ʻaʻohe ʻalae kani, ʻaʻohe ʻūlili holoholo kahakai.
ʻO ia hoʻi, ua maluhia.
Ke Aolama 