03-02-20

ʻO ka lua o ke kanaka ma ʻAmelika Hui Pū ʻIa, ua make ihola i ka mea hoʻomaʻi kolona (colonavirus).

ʻO ia aʻela kekahi poʻo nūhou o kēia lā, ka lā 2 o Malaki, he Pōʻakahi. Welina e nā makamaka. ʻO Ke Aolama kēia a penei ka nūhou.

I ka Pōʻalima nei, make iho nei ke kanaka mua ma ʻAmelika Hui Pū ʻIa i ka mea hoʻomaʻi kolona. Ma ka mokuʻāina nō ʻo Wakinekona. A i ka Pōʻaono nei, make iho nei ka lua o ke kanaka i ua mea hoʻomaʻi lā. He ʻelemakule, ua piha nā makahiki he 70 a ʻoi. Ma Wakinekona nō hoʻi. A e noho ana ʻo ia ma kahi hale mālama maʻi ma kahi o Sitala. A ʻo ka mea ʻāpiki, he mau kānaka nō i ʻōmaʻimaʻi ma laila, a nānā ʻia ko lākou loaʻa a me ka loaʻa ʻole i ka mea hoʻomaʻi kolona. I kēia manawa, he 12 mau kānaka i loaʻa i ia maʻi ma Wakinekona, a ua hōʻoia ʻia nō. A māhuahua aʻela ka nui o nā kānaka i loaʻa i ia maʻi ma kekahi mau mokuʻāina ʻē aku, ʻo ia hoʻi, ʻo Kaleponi, ʻo Pololika, ʻo ʻIlinoe, ʻo Loke ʻAilana a me Nū Ioka.

Eia mai kā kākou ʻōlelo noʻeau,

E! Loaʻa akula ke kalo, ʻo ka ʻapowale.

ʻO ia hoʻi, he hoʻopau manawa ka hana.