03-09-20

ʻO ka lua o ke kanaka o Hawaiʻi nei, ua loaʻa i ka mea hoʻomaʻi COVID-19.

ʻO ia aʻela kekahi poʻo nūhou o kēia lā, ka lā ʻeiwa o Malaki, he Pōʻakahi. Welina e nā makamaka, ʻO Ke Aolama kēia a penei ka nūhou.

Ua loaʻa aku nei ka lua o ke kanaka o Hawaiʻi nei i ka mea hoʻomaʻi COVID-19. Aia ua kanaka lā ke waiho akula ma ke kūlana kūkonukonu. Hele aku nei ʻo ia i ka mokuʻāina ʻo Wakinekona a hoʻi mai nei i Oʻahu nei i kēlā pule aku nei. Akā, i kona wā ma Wakinekona i loaʻa ai i ka maʻi, ma mua hoʻi o kona kau ʻana ma ka mokulele no ka hoʻi ʻana mai i Oʻahu nei. A no laila, ʻo nā kānaka a pau i kau pū ma ka mokulele like, ua loaʻa paha i ia mea hoʻomaʻi, ʻaʻole paha. No ka mea, ʻo ka wā lele loa o ia mea hoʻomaʻi, ʻo ia ka wā e ʻike ʻia ai nā ʻōuli. ʻO nā kānaka ʻelua o Hawaiʻi nei i loaʻa i ka mea hoʻomaʻi COVID-19, ma ka ʻāina ʻē lāua i loaʻa ai i ua maʻi lā, ʻaʻole ma Hawaiʻi nei.

E noi ana ke Kōmikina Hoʻomalu Kahoʻolawe i ka ʻahaʻōlelo i puʻu kālā, he $1 paha miliona a ʻoi ma muli o ke ahi i pau ai nā ʻeka ʻāina he 9,000. Ua maikaʻi ka ua, he kōkua ia ma ke kinai ʻana i ke ahi, akā, ma muli o ia ua, ʻaʻole paha e maopopo ke kumu i ʻā ʻia ai ke ahi, ʻoiai, ua lilo aku paha nā mea hōʻike i ka wai.

Eia mai kā kākou ʻōlelo noʻeau,

Hoʻākāka wale nō kā Kiʻilau.

I ka wā e ʻeha ai ke kanaka i ka ʻōlelo a kona hoa, ʻo ka pane kēia a ua hoa lā, e hōʻike ana, he wehewehe wale iho nō ka hana, ʻaʻole kāna mau ʻōlelo he mau mea hōʻeha naʻau.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s