03-11-20

Kau kekahi mau wāhine i ka hano hāweo.

ʻO ia aʻela kekahi poʻo nūhou o kēia lā, ka lā 11 o Malaki, he Pōʻakolu. Welina e nā makamaka. ʻO Ke Aolama kēia a penei ka nūhou.

Lilo aku nei ka Makana Hoʻonaʻauao ʻo Milken i kekahi kumu aʻo o Hawaiʻi nei a lilo nō hoʻi iā ia he $25,000. ʻO Miki Cacace kona inoa a he kumu ʻo ia ma ke Kula Waena ʻo ʻEwa Makai. He kumu aʻo hua ʻālualua. I kēlā me kēia makahiki, lilo nei makana no ke kūlia ʻana i ka nuʻu i nā kumu aʻo he 40 a puni ʻo ʻAmelika Hui Pū ʻIa a me Hawaiʻi.

Kau aku nei kekahi mau wāhine heʻe nalu o Hawaiʻi nei i ka hano hāweo. ʻOiai ʻo ka Mahina Moʻolelo Wahine ka mahina ʻo Malaki, manaʻo ihola ka Lunamakaʻāinana Lauren Matsumoto lāua me ka Lunamakaʻāinana Sean Quinlan e hoʻohanohano aku i nā wāhine i lilo i mea nui ma ka moʻolelo o ka heʻe nalu. ʻO nā wāhine i kau i ka hano hāweo, ʻo ia ʻo Carissa Moore, ʻo Carol Philips, o “Banzai” Betty Depolito, ʻo Sabrina Brennan, ʻo Keala Kennelly, ʻo Honolua Blomfield a me Paige Alms. A lilo pākahi aku nei ka palapala kū i ka niʻo iā lākou.

I kēia pule nei, e hoʻomaka ana ka Hoʻokūkū Inoa Moho o ka ʻAhahui Komohana Nui o nā kāne a me nā wāhine. Akā, ma muli o ka mea hoʻomaʻi COVID-19, ʻaʻole e ʻae ʻia ke komo ʻana o ka lehulehu no ka nānā ʻana i nā hoʻokūkū. ʻO nā mea wale nō e pono ai ka hoʻokūkū, ʻo lākou wale nō ke komo, ʻo nā mea pāʻani, nā kumu o nā hui, nā ʻuao, a me nā mea e pono ai ka mālama ʻana i nā hoʻokūkū a me ka poʻe kūkala nūhou.

Eia mai kā kākou ʻōlelo noʻeau,

Hāʻule i ka hope waʻa.

He ʻōlelo kēia no ke kanaka hiki lohi mai.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s