E ako ʻē ʻia ana ka hale i ʻole e kulu i ka ua.
ʻO ia aʻela kekahi poʻo nūhou o kēia lā, ka lā 31 o ʻAukake, he Pōʻakahi. Welina e nā makamaka. ʻO Ke Aolama kēia a penei ka nūhou.
Ua hoʻomaka iho nei kahi polokalamu ma Oʻahu nei no ka nānā ʻana i ka loaʻa a me ka loaʻa
ole paha o ke kanaka i ka mea hoʻomaʻi COVID 19. Ua kūkala ʻia ma kēlā Pōʻalua aku nei, e nānā ʻia ana he 5,000 o ka lā a he manuahi nō, ʻaʻohe uku ma nā pule ʻelua. ʻO ka mea ʻāpiki, he pono i nā kānaka he 1,000 a ʻoi aku a emi mai ke hana hou ma muli o ke kākau ʻole ʻia ʻana o ka inoa o ke kanaka ma luna o ka ʻōmoleliʻi e waiho ana ka hāʻae a walewale paha. He 60,000 mau kānaka e nānā ʻia ana me ka uku ʻole. A wahi a ka Hope Kiaʻāina Josh Green, ua noi aku nei ke Kiaʻāina David Ige i ke 30,000 hou aku. A ma ka hopena pule nei ma ka mokupuni ʻo Hawaiʻi, he ʻelua mau kānaka i make aku nei i kahi mea e pili ana i ka mea hoʻomaʻi COVID 19. A ʻo lāua nā makamua o ia mokupuni. A i ka pule nei i hala, ua māhuahua aʻela nā kānaka i loaʻa i ua mea hoʻomaʻi lā ma ka moku o Keawe.
Ua hoʻokaʻawale aku nei ka Hui Uila Hawaiʻi he 9.8 miliona kālā no ka paʻipaʻi ʻana a me ke kua ʻana paha i nā kumu ʻalepikia ma Oʻahu nei i ʻole e pilikia nā uea uila i ka wā e hiki mai ai ka makani pāhili. ʻAʻole i hōʻike ʻia mai ka nui o ke kālā i hoʻokaʻawale ʻia no nā mokupuni ʻē aku.
Eia mai kā kākou ʻōlelo noʻeau,
ʻAʻohe kolopā nāna e une.
He ʻōlelo kēia no ke kanaka poʻo paʻakikī.
Ke Aolama 