Aia nō kekahi mau keiki kula kiʻekiʻe o Hawaiʻi ma ʻAmelika e pāʻani pōpō peku akula.
ʻO ia aʻela kekahi poʻo nūhou o kēia lā, ka lā 2 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.
ʻŌlelo ʻia, ʻo Hawaiʻi ke kikowaena no ke kūʻai moa no ka hakakāamoa ʻana. Mai ka mahina ʻo Kepakemapa o ka makahiki 2016 a i ka mahina ʻo Kepakemapa o ka makahiki 2019, he 750 mau hoʻouna ʻia ʻana o ka moa i Kuama. He 71 mau kānaka nāna ka hoʻouna ʻana, a he 22 o lākou, aia ma Hawaiʻi nei. ʻO ka nui o nā moa i hoʻouna ʻia i Kuama, he 8,800 a ʻoi aku a emi mai, na nā kānaka e noho ana ma Hawaiʻi nei he 1,000 a ʻoi. ʻO ka nui o ke kālā o ka moa kāne hoʻokahi, mai ka $500 a ka $3,000. Ma mua, ua kū ka hakakāamoa i ke kānāwai ma Kuama, akā, i ka mahina ʻo Kēkēmapa o ka makahiki 2019, kau aku nei ke kānāwai pekelala e pāpā ana i ia hana. I kēia manawa, he kūʻē kānāwai ka hoʻohakakā ʻana i ka moa ma nā mokuʻāina he 50 a me nā panalāʻau o ʻAmelika Hui Pū ʻIa. A ma ke kānāwai pekelala, ua pāpā ʻia ke kūʻai ʻana i ka holoholona, ka mālama ʻana, ka hoʻomaʻamaʻa ʻana, ka halihali ʻana, ka hoʻouna ʻana a me ka loaʻa ʻana o kahi holoholona no ka hoʻohakakā ʻana. A ʻo ka hoʻopaʻi ʻoi loa, he ʻelima makahiki o ka noho paʻahao ʻana me ka uku ʻana he $250,000.
Ua haʻalele kekahi mau haumāna pāʻani kinipōpō peku i ke kula kiʻekiʻe ma Hawaiʻi nei, a hele akula no ʻAmelika no ka pāʻani ʻana i ka pōpō peku ma laila. ʻO ia ʻo Tiger Adolpho, ʻo Kainoa Carvalho, ʻo Alan Talanoa a me Danny Kaio o ke Kula Kiʻekiʻe o Kahuku; ʻo Tausili Akana a me Kiai Keone o ke Kula Kiʻekiʻe ʻo Kamehameha; a ʻo Devon Sa-Chishom o ke Kula Kiʻekiʻe o Lahainaluna. ʻO Adolpho, ua haʻalele koke ʻo ia no ʻIkahō ma hope o ka hāʻule ʻana o Kahuku iā Kāna Lui ma ka Hoʻokūkū Inoa Moho o ka mokuʻāina ma Nowemapa. A ʻo ke koena, aia ma Uta i kēia manawa, a i haʻalele lākou iā Hawaii ma muli o ke kāpae ʻia ʻana o ke kikina pōpō peku o kēia makahiki kula nei.
Eia mai kā kākou ʻōlelo noʻeau,
Haʻihaʻi nā iwi o ke kolohe.
He ʻōlelo kēia no ke kolohe i loaʻa pono a hoʻopaʻi ʻia.
Ke Aolama 