He haunahele kai ʻike ʻia ma ka Hale Paʻahao o Hilo.
ʻO ia aʻela kekahi poʻo nūhou o kēia lā, ka lā 9 o Kepakemapa, he Pōʻakolu. Welina e nā makamaka heluhelu. ʻO Ke Aolama kēia a penei ka nūhou.
Ma Oʻahu nei, kūkala aʻela ka Meia Kirk Caldwell i ka hoʻolōʻihi ʻia ʻana o ka wā e noho ai ma ka hale, ʻaʻole e holoholo wale, i mea e māhuahua ʻole ai nā kānaka e loaʻa i ka mea hoʻomaʻi COVID 19. E hoʻomau ʻia ana a ka lā 23 o Kepakemapa, he ʻelua hou pule. Akā, ke hiki aku i ka Pōʻahā, e hiki ana i ke kanaka ke hele hoʻokahi i nā pāka, nā kahakai a me nā ala hele wāwae mamao. I ka Pōʻalua nei, he ʻelua mau kānaka hou i make, ʻo kekahi ma Oʻahu nei a ʻo kekahi ma Maui. A he 66 mau kānaka hou i loaʻa i ka mea hoʻomaʻi COVID. ʻAkahi nō a emi mai i ka haneli. He hoʻokahi mahina a ʻoi, ʻo ka nui o nā kānaka i loaʻa i ua mea hoʻomaʻi nei o ka lā ma Hawaiʻi nei, he 100 a ʻoi aku.
Ua uluāoʻa aʻela kekahi mau paʻahao o ka Hale Paʻahao o Hilo i ka Pōʻalua nei. A puhi akula nō hoʻi lākou i ka pākuʻi A o ia hale paʻahao me ka ʻākeʻakeʻa ʻana aku i nā puka. Kohu mea lā, he hakakā ka mea i ala aʻe ai ka haunaele. Ua ʻeha ihola kekahi mau paʻahao a pilikia ihola kekahi mau luna paʻahao i ka hanu ʻana i ka uahi akā, ʻaʻohe ola i pōʻino, wahi a ka mākaʻi. Ma ka Pōʻakahi nei, he 290 mau paʻahao e noho ana ma ia hale paʻahao o Hilo, akā, ua lawa wale nō ka lumi e noho ai he 206 mau paʻahao. A ʻo ia ka hale paʻahao pihakuʻi loa o ka mokuʻāina ʻo Hawaiʻi.
Eia mai kā kākou ʻōlelo noʻeau,
He ʻūlei kolo.
He ʻōlelo kēia no ke kanaka ikaika.
Ke Aolama 