Aia ka ʻāpana hau ke heheʻe akula.
ʻO ia aʻela kekahi poʻo nūhou o kēia lā, ka lā 14 o Kepakemapa, he Pōʻakahi. Welina e nā makamaka. ʻO Ke Aolama kēia a penei ka nūhou.
Ua hemo iho nei kahi ʻāpana hau nui e uhi ana i kahi māhele o ʻĀina ʻŌmaʻomaʻo. ʻO ka nui o ka ʻāpana hau i hemo, he 42.3 mile kuea, he 50 mile ka lōʻihi a he 12 mile ke ākea. A ke manaʻo nei nā kānaka akeakamai, ʻo ke kumu o ka ʻāpana hau i hemo, ʻo ia ka loli wikiwiki o ke ʻano mau o ka manawa. ʻO ka ʻāpana hau nui loa i paʻa i ka ʻāina, ʻo ia ka mea ma ka hikina ʻākau o ʻĀina ʻŌmaʻomaʻo, a no laila kahi o ka ʻāpana hau ʻakahi a hemo. A mai ka makahiki 1999, ua hemo akula he 62 mile kuea o ia ʻāpana hau. Wahi a Ruth Mottram, he akeakamai ma ka Hui Hoʻohana ʻImi Naʻauao Kenemaka ma Kopenahakena, i kēia makahiki, ua ʻike hou ʻia ka ʻoi aku o ka hau i hemo aku ma mua o ka hau heleleʻi ma ia māhele o ʻĀina ʻŌmaʻomaʻo.
Ua kaiehu ʻia kahi hope mākaʻi nui ma Keokia no kona kuʻi ʻana aku i kahi kanaka Pāʻele ma hope o ka hoʻokū ʻia ʻana o kona kaʻa e kau ana. ʻAʻole i hōʻike ʻia ka inoa o ua hope mākaʻi nui lā, akā, e hoʻokolokolo ana ke keʻena o ka loio ʻāpana. ʻO ka inoa o ke kanaka i kuʻi ʻia, ʻo Roderick Walker, a ua pehu ihola kona maka hema. Wahi a ka hope mākaʻi nui nāna i kuʻi aku iā Walker, ua nahu ʻo Walker iā ia. He hōʻole naʻe ʻo Walker i ka nahu ʻana. ʻO ka mea pōmaikaʻi, ua paʻi wikiō ʻia e kahi kanaka.
Eia mai kā kākou ʻōlelo noʻeau,
Hoʻi mai ʻo Makanikeoe.
ʻO ia hoʻi, ua hoʻi hou mai ka maluhia a me ke aloha.
Ke Aolama 