09-16-20

E mālama ʻia ana nā hoʻokūkū kinipōpō pekupeku o ka ʻAhahui ʻUmi Nui.

ʻO ia aʻela kekahi poʻo nūhou o kēia lā, ka lā 16 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Ua loli ihola ka manaʻo o ka ʻAhahui ʻUmi Nui, e mālama ʻia ana ke kau kinipōpō pekupeku. I kēlā mahina aku nei, ua koho pāloka ka ʻAha o nā Pelekikena a me nā Poʻo Nui o ka ʻAhahui ʻUmi Nui, a he 11 pāloka no ka hoʻopaneʻe ʻana aku i ke kikina, a he ʻekolu i kūʻē, ʻo ia ʻo ʻŌhaio Mokuʻāina, ʻo ʻIowa, a ʻo Nebaraka. Akā, ma ke koho pāloka ʻana aku nei ma ka Pōʻalua nei, ua pau loa nā pāloka no ka hoʻomaka hou ʻana i nā hana ʻālapa. A no laila, e wehe ʻia ana ke kikina kinipōpō peku i ka hopena pule ʻehā o ka mahina ʻo ʻOkakopa. E pāʻani ana nā hui a pau o ia ʻahahui, he 14, i nā hoʻokūkū he ʻewalu ma loko o nā pule ʻewalu, a he manawa paha e pāʻani ai i ka iwa o ka hoʻokūkū ma ka lā 19 o Kēkēmapa.

Ua loaʻa aku nei ka Hope Kiaʻāina Josh Green i ka mea hoʻomaʻi COVID-19, a hoʻomaka ihola ka ʻike ʻia o nā ʻōuli. He piwa kona, a he kahe ka hou anuanu, he kunukunu a me ka māluhiluhi. Akā, aia nō ʻo ia ke lawelawe akula i ka hana hope kiaʻāina ma kona hale. Wahi a Green, he ʻelima a ʻeono paha āna hālāwai o ka lā, a ke hana akula ma kekahi mau māhele o ka hoʻolālā ʻana i ka wehe hou ʻana i ka mokuʻāina. Ua loaʻa nō hoʻi nā kiaʻi ʻelua a Green i ka mea hoʻomaʻi. ʻO ka mea pōmaikaʻi, ʻaʻole i loaʻa kāna wahine a me kā lāua mau keiki ʻelua i ke COVID.

Eia mai kā kākou ʻōlelo noʻeau,

Kū pākū ka pali o Nihoa i ka makani.

He ʻōlelo kēia no ke kanaka e kū wiwo ʻole ana i mua o ka pōʻino e hiki mai ana.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s