Aloha nō ka hala ʻana o kahi wahine i kaulana i ka hana kū i ka pono.
ʻO ia aʻela kekahi poʻo nūhou o kēia lā, ka lā 21 o Kepakemapa, he Pōʻakahi. Welina e nā makamaka heluhelu. ʻO Ke Aolama kēia a penei ka nūhou.
Ua moe aku nei kahi wahine kū i ka pono i ka moe kapu o Niolopua. ʻO ia nō ka Mea Hanohano Ruth Bader Ginsburg. Hala aku nei ʻo ia i ke ala hoʻi ʻole mai i ka Pōʻalima nei i hala ma hope o kona ʻāʻumeʻume ʻana me ka maʻi ʻaʻai mālama. E waiho ana kona kino kupapaʻu ma ka Hale ʻAha Hoʻokolokolo Kiʻekiʻe ma Wakinekona i kēia Pōʻakolu a me ka Pōʻahā no ke kipa ʻana o ka lehulehu. E hoʻomaka ka ʻike ʻana i ka hola 11:00 o ke awakea o ka Pōʻakolu, ʻo ke kāʻei manawa hikina ia, a e mālama ʻia ana a ka hola 10:00 o ka pō Pōʻahā. A ma mua o kēlā, e kipa ʻia ana ʻo ia e nā luna kānāwai a me nā ʻohana o Ginsburg a me kona mau hoa aloha. Ua piha nā makahiki he 87 iā ia a he 27 ona mau makahiki i hana ai ma ke ʻano he luna kānāwai ʻaha kiʻekiʻe.
A hōʻike aʻela ka Pelekikena Donald Trump i kona manaʻo e kūkala aku i kāna koho nāna e hoʻopiha i ka mākālua e waiho hakahaka ana ma ka ʻAha Hoʻokolokolo Kiʻekiʻe. A wahi a Trump, ma ka hopena o kēia pule nei e hōʻike ʻia ai ka luna kānāwai āna e koho ai. A ke kūʻē akula nā Demokalaka, aia a ma hope o ka lā koho pāloka, ka lā 3 o Nowemapa, a laila, e hoʻopihapiha ʻia ka mākālua.
Ua hana ʻino ʻia aku nei ka Pā Ilina Kepanī o Waiʻanae. I ke kipa ʻana aku o Ruby Quijano i ka pā ilina o kona makuahine ma laila i ka lā 13 o Kepakemapa, ʻo ia kona wā i ʻike aku ai i ka waiho wale ʻana o ke kia hoʻomanaʻo o kona makuahine, ua pau i ka hoʻohina ʻia. A ʻike akula nō hoʻi ʻo ia i kekahi mau kia hoʻomanaʻo, ua pau i ka hoʻohina ʻia. Aia nō ka mākaʻi ke noiʻi akula i ia hana māʻewaʻewa.
Eia mai kā kākou ʻōlelo noʻeau,
I kahi ʻē ka mālia, hana i ka makau.
ʻO ia hoʻi, e hana ʻē ʻoe i ka hana i mākaukau ʻoe i ka wā kūpono.
Ke Aolama 