E hoʻomaka ana ke kau kinipōpō o ka ʻAhahui Mauna Komohana i kēia mahina aʻe.
ʻO ia aʻela kekahi poʻo nūhou o kēia lā, ka lā 28 o Kepakemapa, he Pōʻakahi. Welina e nā makamaka heluhelu. ʻO Ke Aolama kēia a penei ka nūhou.
E mālama ʻia ana he ʻehā mau paio kālaimanaʻo o ka moho Lepupalika a me ka moho Kemokalaka e alualu ana i ke kūlana pelekikena, ʻo ia hoʻi ka Pelekikena Donald Trump a me Joe Biden. ʻO nā paio kālaimanaʻo a pau, e hoʻomaka i ka hola 3:00 o ka ʻauinalā ma Hawaiʻi nei a he hoʻokahi hola me ka hapalua, ʻo ia ka lōʻihi. I ka lā 29 ka paio kālaimanaʻo mua, a e hoʻolele ola ʻia ma ke kahua pūnaewele o ka New York Times a me nā kānela CNN, Fox News, CBS, ABC, C-SPAN, NBC a me MSNBC. ʻO ka lua, ma ka lā 15 o ʻOkakopa. E hoʻolele ola ʻia nō ma ke kahua pūnaewele New York Times a me nā nae kānela nūhou. A ʻo ke kolu, ma ka lā 22 o ʻOkakopa. A e hoʻolele ʻia nō hoʻi ma ke kahua pūnaewele New York Times a me nā nae kānela nūhou.
Ua holo ka manaʻo o ka Papa o nā Alakaʻi o ka ʻAhahui Mauna Komohana, i ka hoʻomaka ʻana o ke kau kinipōpo pekupeku o ka makahiki 2020 i ka lā 24 o ʻOkakopa. Akā, aia nō i ke kō a me ke kō ʻole paha o nā koina COVID-19 o ka mokuʻāina a me ke aupuni pekelala. ʻO ka hana e hoʻolālā ʻia nei i kēia manawa, ʻo ia ke ʻano kūpono o ka hele ʻana mai a me ka haʻalele ʻana aku o nā hui pōpō pekupeku. A ma hope ka nānā ʻana i ka loaʻa a me ka loaʻa ʻole paha o ke anaina mākaʻikaʻi. ʻAʻole paha e piha loa ke kahua pāʻani i ka poʻe mākaʻikaʻi, akā, he hapa mai paha e pono ai ke kanaka. Ua paʻa ihola ka lā o ka hoʻokūkū inoa moho o ka ʻAhahui Mauna Komohana, ʻo ka lā 19 ia o Kēkēmapa.
Eia mai kā kākou ʻōlelo noʻeau,
Ola ia kini ke ʻā maila ke ahi.
He ʻōlelo kēia i ka wā e ʻā ʻia ai ke ahi a ʻaneʻane e mākaukau ka mea ʻai e pāʻina ai.
Ke Aolama 