ʻAkahi a laha aku ka maʻi make ʻōhiʻa lauhulu i kekahi mau wahi o Kauaʻi.
ʻO ia aʻela kekahi poʻo nūhou o kēia lā, ka lā 5 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.
He mau kumu ʻōhiʻa hou i loaʻa aku nei i ka maʻi make ʻōhiʻa lauhulu ma Kauaʻi. Ma ka nānā ʻana aku nei ma Kauaʻi, ʻike ʻia aku nei ia mau kumu ʻōhiʻa ma uka aʻe nei o ke awāwa o Hanalei a ma ka ʻaoʻao ʻākau o ke Ala ʻo Powerline. ʻAkahi nō a laha ua maʻi make lā ma ia mau wahi. A ua loaʻa nō kekahi mau kumu ʻōhiʻa hou i ia maʻi ma kahi i laha ʻē ai. Ma ka ʻaoʻao pōmaikaʻi, ʻaʻole i hiki aku ia maʻi make ma Kōkeʻe a me Alakaʻi. He mea nui ka ʻōhiʻa ma ia mau wahi i mea e hoʻomalu ai i ka ʻāina kumu wai a me nā mea ulu a me nā holoholona i ʻane nalowale loa.
I ka Pōʻaono nei, ua hoʻi aku nei nā Kāne Ānuenue i ka hoʻomaʻamaʻa kinipōpō pekupeku. I ka Pōʻakolu nei, i ko lākou wā e hoʻomaʻamaʻa ana, ua hoʻomaopopo ʻia, ua loaʻa he ʻehā mea pāʻani i ka mea hoʻomaʻi COVID19, a no laila, ua kāpae ʻia ihola ka hoʻomaʻamaʻa ʻana. A ʻaʻole lākou i hoʻomaʻamaʻa i ka Pōʻahā a me ka Pōʻalima. I ka lā 24 o ka mahina ʻo ʻOkakopa ka hoʻokūkū mua o Hawaʻi o ke kikina, kahi e kūʻē aku ana iā Fresno Mokuʻāina.
E kūkulu ʻia ana he hale papaʻi ma Mōʻiliʻili, ma kahi i kū ai ka Hale ʻUlu Maika Kahua Pāʻani ma mua. Na ke Keʻena ʻĀina Hoʻopulapula Hawaiʻi ka papahana, a he 277 mau wahi noho i emi kūpono ka uku hoʻolimalima. ʻO ka uku hoʻolimalima o ke keʻena noho ʻuʻuku, he $633 a ʻoi, a no ka hale kaona ʻekolu lumi, he $3,133. Ua kohokoho ʻia ke kālā e hoʻolilo ʻia no ia papahana, he $137 miliona. He 270 mau keʻena noho, he ʻehiku hale kaona, a he 4,680 kapuaʻi kuea no ke kūʻai liʻiliʻi ʻana. Manaʻo ihola ke Keʻena ʻĀina Hoʻopulapula, ke holo pono nā mea a pau, e pau ka hale papaʻi i ke kūkulu ʻia ma waena o ka makahiki 2024.
Eia mai kā kākou ʻōlelo noʻeau,
Ua lele ka manu i Kahiki.
He ʻōlelo kēia no kahi kanaka i hele aku nei, a ʻaʻole hiki ke loaʻa ʻo ia ke ʻimi aku iā ia.
Ke Aolama 