E pāpā ʻia ana ka lehulehu, ʻaʻole e hele i kekahi mau kai kohola o Ko Olina.
ʻO ia aʻela kekahi poʻo nūhou o kēia lā, ka lā 9 o ʻOkakopa, he Pōʻalima. Welina e nā makamaka heluhelu. ʻO Ke Aolama kēia a penei ka nūhou.
I ka Pōʻahā nei, hōʻike aʻela ka Hui ʻo Hamada Suisan i ke kū o ka hewa iā ia no ke ʻoki ʻana o kekahi mau limahana i ke kualā manō. ʻO ka poʻe nāna ia hana, he mau limahana lākou no kekahi moku lawaiʻa Kepanī o ia hui. I ka makahiki 2018, ʻo ia ka wā i ʻokiʻoki ʻia ai a hemo nā kualā manō, a loaʻa he 1,000 kualā a emi mai ma loko o nā ukana a ia poʻe limahana. Ua hopu ʻia ihola he 10 lawaiʻa no ka hoʻopae malū ʻana i ʻInidonesia. Ua ʻae akula ka Hui ʻo Hamada Suisan i ka uku ʻana he $235,000 no ke kōkua a me ka weʻaweʻa ʻana i ka hoʻāʻo ʻana e hoʻopae i ke kualā manō.
He manaʻo ko ka Hōkele ʻo Ko Olina e pāpā aku, ʻaʻole e hele aku ka lehulehu i kekahi o kona mau kai kohola. He ʻehā kai kohola o ia hōkele, a ʻo nā kai kohola mua ʻekolu ke hoʻokaʻawale ʻia no nā kānaka e noho ana ma ia hōkele a me nā keʻena noho. A ʻo ka hā, e hoʻokaʻawale ʻia no ka lehulehu. Mai ka lā mua o Nowemapa a i ka lā mua o Pepeluali e hoʻokaʻawale ʻia ai nā kai kohola mua ʻekolu. He manaʻo ko Ko Olina, he hana kēia e hoʻopakele ai i nā kamaʻāina i ka wā e māhuahua hou ai nā malihini mākaʻikaʻi, ʻo ia hoʻi, i ʻole e laha loa ka mea hoʻomaʻi COVID. ʻO ka mea ʻāpiki, he kūʻē kānāwai ka pāpā ʻana o Ko Olina i ka hele o ka lehulehu i kona mau kahakai.
Eia mai kā kākou ʻōlelo noʻeau,
Paʻa ka waʻa i Kaʻena.
He ʻōlelo kēia no ke kanaka i huhū.
Ke Aolama 